«ԶԱՐԹՕՆՔ», ՊԷՅՐՈՒԹ – Հայաստանի նախագահ Արմէն Սարգսեան այսօր Թիֆլիսի մէջ առանձնազրոյց ունեցած է Վրաստանի վարչապետ Մամուքա Պախթաձէի հետ:
Մամուքա Պախթաձէ շնորհակալութիւն յայտնած է Արմէն Սարգսեանին Վրաստանի նորընտիր նախագահին երդմնակալութեան արարողութեան մասնակցելու համար, կը հաղորդէ նախագահի մամուլի գրասենեակը:
Արմէն Սարգսեան նշած է, որ իրեն համար պատիւ է Վրաստանի համար այս կարեւոր իրադարձութեան ատեն գտնուիլ հարեւան ու բարեկամ երկրին մէջ:
Հայաստանի նախագահը ու Վրաստանի վարչապետը մտքեր փոխանակած են հայ-վրացական յարաբերութիւններու ներկայ օրակարգի շուրջ` ընդգծելով համագործակցութիւնը տարբեր ոլորտներու մէջ խորացնելու կարեւորութիւնը:
