«ԶԱՐԹՕՆՔ», ՊԷՅՐՈՒԹ – «Իմ քայլը» դաշինքը Ազգային ժողովի՝ Դեկտեմբեր 9ին կայացած արտահերթ ընտրութիւններուն արդիւնքներուն համաձայն՝ կը ստանայ պատգամաւորի 88 աթոռ, «Բարգաւաճ Հայաստան» կուսակցութիւնը՝ 26, եւ «Լուսաւոր Հայաստան» կուսակցութիւնը՝ 18 աթոռ։ «Իմ քայլը» դաշինքի չորս աթոռը կը ստանայ Հայաստանի եզիտի, ռուս, ասորի եւ քիւրտ ազգային փոքրամասնութիւններու 1ական ներկայացուցիչ։ Համապատասխան որոշումը հաստատուած է ՀՀ կեդրոնական ընտրական յանձնաժողովի Դեկտեմբեր 16ի նիստին։ Միաժամանակ, «Իմ քայլը» դաշինքի 42ական պատգամաւոր ընտրուած են համապետական եւ տարածքային ընտրական ցուցակներով, ԲՀԿի պարագային՝ 13ական, եւ ԼՀԿի պարագային՝ 9ական։
Ինչպէս կը տեղեկացնեն ՀՀ ԿԸՅ պաշտօնական կայքէն, մէկ այլ որոշմամբ յանձնաժողովը որոշում ընդունած է վերոնշեալ ընտրութիւններու արդիւնքներուն վերաբերեալ՝ նշելով, որ «Հայաստանի Հանրապետութեան Ազգային ժողովի 2018 թուականի Դեկտեմբեր 9ին կայացած արտահերթ ընտրութիւններու նախապատրաստման եւ քուէարկութեան ընթացքին տեղի չեն ունեցած Հայաստանի Հանրապետութեան ընտրական օրէնսգիրքի այնպիսի խախտումներ, որոնք կրնային ազդել ընտրութեան արդիւնքին վրայ»:
