ՆՈՐ ՕՐ, ԼՈՍ ԱՆՃԵԼԸՍ.- Հոլիվուտի Տոլպի սրահին մէջ, Դեկտեմբեր 9-ին տեղի ունեցաւ Հայ-ամերիկեան թանգարանի անդրանիկ կալան։ Պատուըուեցան Կլենտէյլի Քաղաքային խորհուրդը, որ ապահոված էր հողաշերտը, ուր պիտի կառուցուի թանգարանը, ինչպէս նաեւ Քալիֆորնիոյ սենաթորներ Անթոնի Փորթանթինոն, Քեւըն տը Լիոնը, Քալիֆորնիոյ խորհրդարանի անդամ Ատրին Նազարեանը եւ նոյն խորհրդարանի խօսնակ Անթոնի Ռենտընը, որոնք մեծ գումարներ ապահոված էին Քալիֆորնիա նահանգէն։ Լոս Անճելըս գաւառի վերահսկիչ Քաթրին Պարկըր նոյնպէս անակնկալի բերաւ ներկաները մէկ միլիոն տոլար նուիրելով մշակութային եւ կրթական կեդրոնին։
Օրուան հանդիսավարն էր Ֆոքս 11-ի լրագրող Արաքսիա Կարապետեան։ Թանգարանի յանձնախումբի ատենապետ Պերճ Կարապետեան փոխանցեց օրուան պատգամը։ Խօսք առին քոնկրէսական Ատամ Շիֆ, Քաթրին Պարկըր եւ ուրիշներ։
Հայ-ամերիկեան թանգարանը իր տեսակին մէջ մշակութային եւ կրթական յատուկ կեդրոն մը պիտի ըլլայ Կլենտէյլի սիրտին վրայ։ Ան պիտի ունենայ մնայուն ցուցահանդէս, բազմամշակոյթ ճամբորդող այլ ցուցահանդէսներ, թատրոն, ուսումնասիրութիւններու կեդրոն, խոհանոց, արխիւ եւ շատ աւելին։
Բացառիկ ծրագիր մըն է այս, որ քով-քովի բերած է ամերիկահայ բոլոր կազմակերպութիւնները, որոնք բոլորն ալ ունին իրենց պատասխանատուութիւնները։
Այս մասին կազմակերպիչ մարմինին ծաւալուն թղթակցութիւնը տեսնել էջ 9։
