«ԶԱՐԹՕՆՔ», ՊԷՅՐՈՒԹ – Հանրապետութեան նախագահ Արմէն Սարգսեան` տիկնոջ Նունէ Սարգսեանի հետ այսօր այցելած է մայր Աթոռ Սուրբ Էջմիածին եւ իր իսկ բարերարութեամբ կառուցուած սուրբ Յովհաննէս Մկրտիչ եւ Սուրբ Վարդան մատուռ-մկրտարանին մէջ ներկայ գտնուած է 1988-ի աւերիչ երկրաշարժի զոհերու հոգիներու հանգստութեան համար արարողութեան:
Հոգեհանգստը կատարուած է Գարեգին Բ․ամենայն Հայոց Կաթողիկոսի նախագահութեամբ:
Մինչ արարողութիւնը խօսքով հանդէս եկած է Մայր Աթոռի արտաքին յարաբերութիւններու բաժնի պատասխանատու Նաթան արք․ Յովհաննիսեան` անդրադառնալով մեր ժողովուրդին աղէտալի երկրաշարժի պատճառած ծանր կորուստներուն եւ առայսօր դեռ ամբողջութեամբ չյաղթահարուած հետեւանքներուն:
Հոգեհանգստեան կարգի ընթացքին Մայր Աթոռի միաբանութիւնը Վեհափառի գլխաւորութեամբ աղօթած է նաեւ օրերս զոհուած օդաչուներ փոխգնդապետ Արմէն Բաբայեանի ու աւագ սպայ Մովսէս Մանուկեանի եւ զինծառայող Հայկ Քարամեանի հոգիներու խաղաղութեան համար:
