«ԶԱՐԹՕՆՔ», ՊԷՅՐՈՒԹ – Սպիտակ տան նախկին ղեկավար Ճորճ Պուշ Աւագը, որ անցեալ շաբաթ մահացած է 94 տարեկան հասակին, Դեկտեմբեր 6ին հողին յանձնեցին Թեքսասի գիւղատնտեսական եւ մեքենաշինական համալսարանին կից իր անուան նախագահական գրադարանի տարածքին: Դեկտեմբեր 6ին այս մասին Twitterի մէջ յայտնած է նախկին նախագահի պաշտօնական ներկայացուցիչ Ճիմ Մաքկրաթը, կը հաղորդէ «Արմէնփրես»ը:
Պուշ Աւագը թաղած են գրադարանի շէնքին մօտ, այնտեղ կը հանգչի նախկին նախագահի տիկինը՝ Պարպարա Պուշը, ինչպէս նաեւ իրենց դուստրը՝ Ռոպինը, որ 1953 թուականին մահացած է երեք տարեկան հասակին: ԱՄՆի նախկին առաջին տիկինը կեանքէն հեռացած է Ապրիլին, ան 93 տարեկան էր:
Յուղարկաւորութեան արարողութիւնը եղած է փակ: Պուշ Աւագի դիով դագաղը Հիւսթոնէն (Թեքսասի նահանգ) Գոլէճ Սթեյշըն բերած են գնացքով՝ իր ընտանիքի անդամներուն եւ մերձաւորներուն ուղեկցութեամբ: Սգոյ թափօրը ցուցադրած են կեդրոնական հեռուստաալիքները, հաղորդած է «ԹԱՍՍ»ը:
