ՀՀ կառավարությունը դեռ հստակ որոշում չունի ԱԺ պատգամավոր Մանվել Գրիգորյանի ու Մաքսային կոմիտեի նախկին պետ Արմեն Ավետիսյանի կողմից պետությանը նվիրաբերվող գույքի վերաբերյալ: «Արմենպրես»-ի փոխանցմամբ՝ այս մասին դեկտեմբերի 6-ին ՀՀ կառավարությունում լրագրողների հետ զրույցում ասաց ՀՀ պետգույքի կոմիտեի նախագահ Նարեկ Բաբայանը:
«Չի բացառվում, որ տվյալ գույքն ապօրինաբար է ձեռք բերվել և ճիշտ չէ ապօրինաբար ձեռք բերվածն ընդունել: Դա կախված է նաև իրավապահ մարմնի դիրքորոշումից: Մյուս կողմից էլ կառավարությունը կարող է քաղաքական որոշում կայացնել` հաշվի նստելով կամ չնստելով իրավապահ համակարգի հետ: Հիմա մենք սպասում ենք վերջնական գնահատականին, բայց զուգահեռաբար մշակում ենք բոլոր տարբերակները: Սակայն շատ ավելի արդյունավետ կլինի ընդունել նվիրաբերվող գույքը հիմա, քան սպասել քրեական վարույթների ավարտին, որոնք կարող են մեկ տարուց ավելի տևել»,- ասաց Բաբայանը:
Կոմիտեի նախագահի խոսքով՝ Արմեն Ավետիսյանին պատկանող «Գոլդեն Փելես» հյուրանոցը պետգույքի կառավարման կոմիտեի հաշվեկշռում գրանցվելուց հետո կդրվի աճուրդի և կհանձնվի միջազգային հայտնի որևէ բրենդի: Նարեկ Բաբայանը նշեց, որ հնարավոր է պետությանը գույք նվիրաբերել ցանկացողներ այս պահին էլի լինեն:
«Չի բացառվում, որ այլ դիմումներ էլ կան, բայց ոչ պետգույքի կառավարման կոմիտեում»,- ասաց Բաբայանը:
