«Լուսավոր Հայաստան» կուսակցությունը միշտ դեմ է եղել համայնքների խոշորացման այս բարեփոխումներին: Ինչպես տեղեկացնում է «Արմենպրես»–ը , Տավուշի մարզի Վերին Կարմիրաղբյուր սահմանամերձ գյուղում քարոզարշավի ժամանակ այս մասին ասաց «Լուսավոր Հայաստան» կուսակցության նախագահ Էդմոն Մարուքյանը:
«Մենք դրան դեմ ենք խոսել և դեմ ենք քվեարկել: Դրան գումարած՝ ես բարձրաձայնել եմ, որ տեղական ինքնակառավարման մասին, տեղական հանրաքվեի մասին օրենքների և եվրոպական խարտիայի խախտումներով է Հայաստանում իրականացվել համայնքների խոշորացումը»,- ասաց Մարուքյանը:
Նրա դիտարկմամբ` եթե մի բան որպես գաղափար Շվեդիայում արդյունք է տվել, դա չի նշանակում, որ նույն արդյունքը կարող է տալ Բերդի շրջանում, որտեղ հակառակորդը ամեն օր կրակում է այս ուղղությամբ:
«Շվեդիայի պայմանները մեր պայմանների հետ համեմատելն աբսուրդ է»,- ընդգծեց Մարուքյանը:
«Լուսավոր Հայաստան» կուսակցության նախագահը վստահեցրեց, որ այս հարցով իրենք զբաղվել են և մանրամասն խնդիրը գիտեն:
«Լուսավոր Հայաստան»-ը հանդես է գալիս տարածքային համաչափ զարգացման օրակարգով: Սա նշանակում է, որ փոքր ու մեծ համայնքներում կյանքի որակը չպետք է տարբերվի ավելի խոշոր և ավելի մեծ համայնքների կյանքի որակից: Դոտացիաների համակարգը պետք է փոփոխության ենթարկվի»,- նշեց Մարուքյանը:
Նրա խոսքով` «Լուսավոր Հայաստանը» վերանայելու է համայնքների խոշորացման ծրագրերը:
