Հինգշաբթի, 29 Նոյեմբեր 2018ին նախագահութեամբ Ն.Ս.Օ.Տ.Տ. Արամ Ա. կաթողիկոսի եւ ատենապետութեամբ Երուանդ Փամպուքեանի՝ Մեծի Տանն Կիլիկիոյ կաթողիկոսութեան արեւմտահայերէնի յանձնաժողովի հանդիպումը տեղի ունեցաւ Անթիլիասի մայրավանքին մէջ:
Աշխատանքային հանդիպումին լայնօրէն քննարկուեցան կատարուած աշխատանքները, ի մասնաւորի ուղղագրութեան առնչուած ուղեցոյցը: Որոշ փոփոխութիւններէ ետք, յիշեալ ուղեցոյցը պիտի ղրկուի յանձնաժողովի սփիւռքատարած անդամներուն՝ ստանալու համար անոնց տեսակէտը։ Նոյն ուղեցոյցը նաեւ պիտի տեղադրուի կաթողիկոսարանի կայքէջին վրայ, որպէսզի լեզուագէտներ, ուսուցիչներ, մտաւորականներ եւ արեւմտահայերէնի մասնագէտ ազգայիններ կարենան յանձնաժողովին յայտնել իրենց տեսակէտները։
Ժողովը նաեւ քննեց սոյն աշխատանքը արհեստագիտութեան ճամբով մեր ժողովուրդի զաւակներուն տրամադրելու կարելիութիւնները:
Ժողովի աւարտին, վեհափառ հայրապետը շեշտեց, որ հակառակ մեր դիմագրաւած դժուարութիւններուն՝ Մեծի Տանն Կիլիկիոյ կաթողիկոսութեան արեւմտահայերէնի պաշտպանութեան այս աշխատանքը պիտի շարունակուի, որովհետեւ արեւմտահայերէնը Սփիւռքի մէջ հայապահպանման կարեւոր կռուաններէն մէկը կը կազմէ:
