«ԶԱՐԹՕՆՔ», ՊԷՅՐՈՒԹ – Միացեալ ազգերու կազմակերպութեան (ՄԱԿ) մէջ Սուրիոյ մշտական ներկայացուցիչը խօսած է Սուրիոյ տարածքին Թուրքիոյ կողմէ իրականացուող քայլերու մասին եւ նախազգուշացուցած Թուրքիան: Այս մասին, ինչպէս կը հաղորդէ «Արմէնփրես»ը, կը յայտնէ «ՌԻԱ Նովոսթի»ն:
ՄԱԿի մէջ Սուրիոյ մշտական ներկայացուցիչ Պաշար Ժաֆարին յայտարարած է, որ Թուրքիան կը խախտէ Սոչիի համաժողովին ստանձնած պարտականութիւնները, եւ Սուրիոյ տարածքին 12 հսկիչ կէտեր ստեղծելու եւ ոստիկաններ տեղակայելու փոխարէն զինուած ուժեր կը կեդրոնացնէ: Ժաֆարին յայտնած է, որ Թուրքիա կրնայ օգնութիւն ցուցաբերել իր զօրքերը դուրս բերելով Սուրիայէն:
«Անօրինական կերպով Սուրիա մուտք գործած թրքական զօրքը պէտք է դուրս բերուի»,- ըսած է Ժաֆարին:
Սուրիոյ ներկայացուցիչը յայտարարած է, որ եթէ Թուրքիան ինքնակամ դուրս չբերէ զօրքերը, ապա Սուրիան այլ միջոցներու կը ձեռնարկէ:
