ՆՈՐ ՕՐ, ԼՈՍ ԱՆՃԵԼԸՍ.- Գոհաբանութեան տօնին առիթով տեղի ունեցած ամենամեայ հանգանակութիւնը այս տարի հատեց տասը միլիոնի սահմանը։ Հինգշաբթի, Նոյեմբեր 22-ի առաւօտեան ժամը տասէն գիշերուան ժամը 10, 12 ժամ շարունակ Կլենտէյլի ARTN-ի սթիւտիոյէն ներս Թելեթոնին յաջողութիւնը, տասնեակներով կամաւորներու, Հիմնադրամի Լոս Անճելըսի պաշտօնէութեան, հարիւրաւոր հայրենակիցներու ներկայութեան, անոնց խօսքին, հեռախօսազանգերուն եւ վերջապէս ազգային-հասարակական գրեթէ բոլոր կառոյցներու ներկայացուցիչներուն համընդհանուր աշխատանքին արդիւնքն էր։
Ընդհանուր հանգանակուած գումար յայտարարուեցաւ 11 միլիոն 109 հազար 633 տոլար, սակայն այս թիւը ենթակայ է փոփոխութեան, պարզ այն պատճառով, որ նուիրատուութիւնները կը շարունակուին տակաւին։
Յատկանշական է նշել, թէ 2,5 միլիոն տոլարի անյայտ բարերար մը, ինչպէս նաեւ մէկական միլիոն տոլարով, յայտնի գործարար բարերարներ Անդրանիկ Պաղտասարեան եւ Ալպերթ Պոյաճեան՝ աւելի քան մէկ երրորդը գոյացուցին հաւաքուած ընդհանուր գումարին։
Հեռուստամարաթոնին ներկայ էր Արցախի նախագահ Բակօ Սահակեանի գլխաւորած պատուիրակութիւնը, որուն մաս կը կազմէր նաեւ Արցախի քաջարի առաջնորդ՝ Պարգեւ Արք. Մարտիրոսեան։ Ներկայ էին նաեւ Արցախի Ուաշինկթընի ներկայացուցիչ Ռոպերթ Աւետիսեան, Հիմնադրամի նորանշանակ տնօրէն Հայկակ Արշամեան։
Յաջողութիւն կը մաղթենք Հիմնադրամին ծրագիրներուն, ըլլան անոնք Հայաստանի սահմանամերձ Տաւուշի շրջանին մէջ, ըլլայ Արցախ կամ սուրիահայութեան՝ Հալէպի մէջ։ Հայաստանի եւ Արցախի մէջ յատկացումները պիտի ուղղուին ենթակառուցուածքային շինարարութիւններու եւ ջերմուժի ծրագիրներու։
Կը սպասենք թափանցիկութիւն եւ ժամանակ առ ժամանակ ծախսերու յստակ ներկայացում՝ պատկան կազմակերպութիւններու ներկայացուցիչներուն եւ ընդհանրապէս՝ հանրութեան։
Անհրաժեշտ է վերաձեւափոխել Հիմնադրամին կառոյցը եւ վերջ տալ մսխումներուն. այո՛, ուշ ենք, բայց ո՛չ ուշացած…
ՆՈՐ ՕՐ
