«ԶԱՐԹՕՆՔ», ՊԷՅՐՈՒԹ – Մեծ Բրիտանիան եւ Ֆրանսան Calais նաւահանգիստին մէջ ստեղծած են սահմանին յանցաւորութեան դէմ պայքարի համակարգող-տեղեկատուական կեդրոն: Ինչպէս ըսուած է Մեծ Բրիտանիոյ ներքին գործոց նախարարութեան տարածած հաղորդագրութեան մէջ, կեդրոնը աշխատանքը սկսած է Նոյեմբեր 27ին, կը հաղորդէ «Արմէնփրես»ը:
Կեդրոնի հիմնական խնդիրները կ’ըլլան երկու պետութիւններու սահմանապահ ծառայութիւններուն օգնութեան ցուցաբերումը տեղեկութեան փոխանակման, հասարակական անվտանգութեան սպառնալիքներու կանխման եւ սահմանի ապօրինի հատման դէպքերու դէմ պարքարի գործին մէջ:
Կեդրոնը նաեւ պէտք է օգնէ կազմակերպուած յանցաւոր խումբերու բացայայտման եւ անոնց գործունէութեան դադրեցման, որոնք մասնագիտացած են անօրինական գաղթականները Լա Մանշով Մեծ Բրիտանիա փոխադրելու գործին մէջ: Բացի անկէ՝ կեդրոնը կը զբաղի փոխադրամիջոցներու հոսքերու վերլուծութեամբ, հաղորդած է «ԹԱՍՍ»ը:
