«ԶԱՐԹՕՆՔ», ՊԷՅՐՈՒԹ – Պաշտօնական այցով Գերմանիոյ Դաշնային Հանրապետութիւն գտնուող Հայաստանի Հանրապետութեան նախագահ Արմէն Սարգսեան Պեռլինի մէջ երէկ մասնակցած է Միւնխենի անվտանգութեան միջազգային համաժողովի կողմէ կազմակերպուած քննարկումին:
Ինչպէս կը հաղորդէ «Արմէնփրես»ը, ՀՀ նախագահի աշխատակազմի հասարակայնութեան հետ կապերու վարչութենէն կը տեղեկացնեն, որ միջոցառումին ներկայ եղած են համաժողովի նախագահ Ուոլֆկանկ Իշինկերը, ԳԴՀ արտաքին քաղաքական եւ պաշտպանական գերատեսչութիւններու ներկայացուցիչներ, Պունտեսթակի եւ Եւրախորհրդարանի պատգամաւորներ, անվտանգութեան հարցերով յայտնի փորձագէտներ, հետազօտական կեդրոններու ղեկավարներ:
Հանդիպումին քննարկումներ ծաւալուած է համաշխարհային անվտանգութեան, աշխարհի մէջ տեղի ունեցող սրընթաց փոփոխութիւններուն, առկայ մարտահրաւէրներուն եւ սպառնալիքներուն, զանոնք դիմակայելու հնարաւորութիւններուն շուրջ։
Նախագահ Արմէն Սարգսեան իր խօսքին մէջ մասնաւորապէս նշած է, որ Հայաստանը բաց է գործակցութեան համար եւ պատրաստ է դառնալու տարաբնոյթ քննարկումներու հարթակ:
