«ԶԱՐԹՕՆՔ», ՊԷՅՐՈՒԹ – Նախագահ Արմէն Սարգսեան ուղերձ յղած է Ազգային ժողովի ընտրութիւններու քարոզարշաւի մեկնարկին առթիւ:
Ինչպէս կը փոխանցէ «Արմէնփրես»ը, Հայաստանի Հանրապետութեան նախագահի աշխատակազմի հասարակայնութեան եւ տեղեկատուութեան միջոցներու հետ կապերու վարչութենէն կը տեղեկացնեն, որ ուղերձին մէջ նշուած է.
«Սիրելի՛ հայրենակիցներ,
Նոյեմբերի 26ին մեկնարկում է Ազգային ժողովի արտահերթ ընտրութիւնների քարոզարշաւը:
Այս ընտրութիւններն ապրիլ-մայիսեան մեծ փոփոխութիւններից յետոյ Հայաստանի քաղաքական կեանքի կարեւորագոյն իրադարձութիւնն են, որի արդիւնքները շատ էական են երկրի զարգացման եւ հեռանկարների առումով:
Իւրաքանչիւրիցս պահանջուում են բարձր պատասխանատուութիւն եւ գիտակցութիւն՝ ինչ պաշտօնում էլ լինենք, ինչ հնարաւորութիւններ էլ ունենանք:
Ուստի դիմում եմ պետական մարմիններին. արժանապատուօրէն շարունակէ՛ք ձեր օրինական պարտականութիւնների եւ սահմանադրական պահանջների կատարումը։ Վստահ եմ, որ ազատ, հաւասար ու օրինական ընտրութիւններն այլեւս մեր նոր պատմութեան անբաժանելի մասն են։
Դիմում եմ ընտրութիւններին մասնակցող քաղաքական կուսակցութիւններին եւ դաշինքներին. յոյս ունեմ, որ մեծագոյն պատասխանատուութեամբ էք մօտեցել ձեր քաղաքական յայտերի՝ թիմերի եւ ծրագրերի ձեւաւորմանը: Դրանք ուղենշելու են Հայաստանի հետագայ զարգացման ճանապարհները:
Հաւատարիմ եղէ՛ք ձեր դաւանած արժէքներին, միեւնոյն ժամանակ, յարգալից ու բարեկիրթ՝ միմեանց նկատմամբ։
Գալիք ընտրութիւններում յաջողութիւն եմ մաղթում մասնակից բոլոր քաղաքական միաւորներին:
Դիմում եմ մեր քաղաքացիներին. ծրագրերի քննարկման ժամանակ եղէ՛ք պահանջատէր, լսէ՛ք բոլորին, որպէսզի տեղեկացուած եւ գիտակցուած կերպով կատարէք ձեր ընտրութիւնը։ Կայացրէ՛ք ձեր որոշումը Հայաստանի զարգացման ձեր պատկերացումներին, ձեր արժէքներին համապատասխան:
Յիշէ՛ք, որ բոլորիցս եւ իւրաքանչիւրիցս է կախուած Հայաստանի ապագան։
Աստուած պահապան Հայաստանի Հանրապետութեանը, Արցախի Հանրապետութեանը, ողջ հայ ժողովրդին եւ Հայաստանի Հանրապետութեան բոլոր քաղաքացիներին»:
