ՆՈՐ ՕՐ, ԼՈՍ ԱՆՃԵԼԸՍ.- Համազգային հայ կրթական եւ մշակութային միութեան նախաձեռնութեամբ, մասնակցութեամբ ԹՄՄ, Նոր Սերունդ եւ Պոլսահայ միութիւններու եւ «Ասպարէզ» օրաթերթին, Ուրբաթ Նոյեմբեր 9-ի երեկոյեան մեծարուեցաւ բանաստեղծ եւ արձակագիր Վեհանոյշ Թեքեան, ծննդեան 70-րդ եւ գրական գործունէութեան 50-րդ տարեդարձներուն առիթով։ Գլխաւոր բանախօսն էր UCLA-ի հայագիտական առարկաներու դասախօս՝ Փրոֆ Յակոբ Կիւլլիւճեան։ Հանդիսավար՝ Քնար Գորթոշեան, յոբելեարին կեանքի ուղին՝ Վանիա Պապիկեան, մեներգ՝ Թամար Թիւֆէնքճեան, շնորհաւորանք՝ Համազգայինի ատենապետուհի Սեդա Սիմոնեան եւ սրտի խօսք՝ Վեհանոյշ Թէքեան։
Երեկոյին ընթացքին հեղինակէն ընթերցումներ կատարեցին խումբ մը շնորհալի աշակերտներ Ռոզ եւ Ալեք Փիլիպոս վարժարանէն։
Հանդիսութեան ընթացքին բեմ բարձրացան կազմակերպիչ միութիւններու ներկայացուցիչները, որոնք յիշատակի լուսանկար մը քաշուեցան նիւեորքաբնակ, նախկին լիբանանահայ բանաստեղծուհիին հետ։ Անոր յանձնուեցաւ մատեան մը, ուր հաւաքուած եւ ի մի բերուած էին շնորհաւորական խօսքեր գաղութէ մտաւորականութենէն։
Թեքեանի գրիչին կը պատկանին՝ «Կապոյտ Ապրիլ», «Ոստրէ», «Ճեղքուած մանրանկար», «Կիզակէտ», «Նշանագիր», «Բազմածուփ աշխարհ», «Տոհմածառ», «Սնունդ եւ անդունդ», «Հրագիր», «Խօսող լերան պատմութիւնը», «Աղօքթներ ուկանի մէջ», «Սփիւռքագիր» եւ «Սփիւռքապատում» հատորները վերջին երկուքը հրատարակուած են 2017-ին։
Միջոցառումէն օր մը առաջ Գերշ Տ Մուշեղ Արք Մարտիրոսեան պատուած էր հեղինակը «Ս Մեսրոպ Մաշտոց» շքանշանով։
Մեր շնորհաւորանքը Վեհանոյշ Թեքեանին։
