«ԶԱՐԹՕՆՔ», ՊԷՅՐՈՒԹ- ԱՄՆի Գալիֆորնիոյ նահանգի հիւսիսային Պիութի ստորաբաժանումին մէջ բնական հրդեհներու զոհերու թիւը հասած է 81ի: Այդ մասին, ինչպէս կը փոխանցէ «Արմէնփրես»ը, Նոյեմբեր 21ին յայտնած է «Associated Press» գործակալութիւնը: Այսպիսով Գալիֆորնիոյ մէջ հրդեհներէն զոհուածներու ընդհանուր թիւը ներկայիս կը կազմէ 84: Անյայտ կորսուած կը համարուի 699 մարդ:
Ինչպէս կը նշէ գործակալութիւնը, հրդեհէն զոհուածներու ինքնութիւնը կը պարզեն DNAի միջոցով: Ըստ վերջին տուեալներու՝ «Քեմբ» հրդեհէն Պիութի ստորաբաժանումին մէջ ամբողջովին այրած է աւելի քան 500 քառակուսի քիլոմեթր մակերեսով տարածք եւ ոչնչացուած աւելի քան 12 հազար շինութիւն: Նահանգի անտառատնտեսութեան եւ հրշէջ պահպանութեան վարչութեան տուեալներով՝ կրակի ճարակ դարձած է աւելի քան 10 հազար բնակելի շէնք: «Քեմբ»ը կարելի եղած է արգելափակել 65 տոկոսով:
Աւելի կանուխ ԱՄՆի նախագահ Տոնալտ Թրամփ տարերային աղէտի գօտի յայտարարած է Գալիֆորնիոյ նահանգը, հաղորդած է «ՏԱՍՍ»ը:
