«ԶԱՐԹՕՆՔ», ՊԷՅՐՈՒԹ- Ֆրանսայի Իլ տը Ֆրանս տարածաշրջանի նախագահ Վալերի Փեքրեսը խորապէս ցնցուած է Հայոց ցեղասպանութեան թանգարան-հիմնարկով եւ այն պատկերներէն, որոնք փակցուած են պատերուն։ Ան նաեւ խորապէս հասկցած է, թէ ի՛նչ մեծ քանակութեամբ քաղաքական ուղերձներ կը յղէ թանգարանը: Այս մասին Վալերի Փեքրեսը յայտնած է «Արմէնփրես»ի հետ զրոյցի ժամանակ։
Երեւանի քաղաքապետ Հայկ Մարութեանի հրաւէրով Հայաստան ժամանած Իլ տը Ֆրանս տարածարջանի նախագահ Վալերի Փեքրեսի գլխաւորած պատուիրակութիւնը այցելեց Ծիծեռնակաբերդի յուշահամալիր եւ յարգանքի տուրք մատուցեց Հայոց ցեղասպանութեան զոհերու յիշատակին: Հայոց ցեղասպանութեան թանգարան-հիմնարկի տնօրէնը տիկին Փեքրեսին ներկայացուց Հայոց ցեղասպանութեան զոհերու յիշատակը յաւերժացնող Ծիծեռնակաբերդի յուշահամալիրի ստեղծման պատմութիւնը: Փեքրեսը նաեւ շրջայց կատարեց Հայոց ցեղասպանութեան թանգարան-հիմնարկին մէջ, գրառում կատարեց թանգարանի յուշամատեանին մէջ:
Ան նշեց, որ 28 տարի առաջ այցելած է Երեւան եւ առաջին անգամ չէ, որ կ’այցելէ այս յուշահամալիրը, սակայն առաջին անգամ գտնուած է Հայոց ցեղասպանութեան թանգարանին մէջ:
Փեքրեսը նաեւ պատմեց, որ խորապէս ցնցուած էր, երբ այցելած էր Մուսայ լերան հերոսամարտի յուշահամալիրը, ուր իրեն ներկայացուցին, թէ ինչպէս ֆրանսացի նաւաստիները դէմ երթալով ընթացակարգերուն՝ յաջողեցան փրկել հայերը:
Իլ տը Ֆրանս տարածարջանի նախագահը Ծիծեռնակաբերդի ծառուղիին մէջ խորհրդանշական եղեւնի տնկեց:
Վալերի Փեքրեսի գլխաւորած պատուիրակութեան կազմին մէջ Երեւան ժամանած են Իլ տը Ֆրանսի շրջանի ընտրուած պաշտօնեաներ, հայկական համայնքի կազմակերպութիւններու, տնտեսական ոլորտի ներկայացուցիչներ, ձեռնարկատէրեր:
