Լիբանանը երէկ ականատես եղաւ պատմական հաշտութեան մը, որ տեղի ունեցաւ Մարատա Հոսանքի եւ Լիբանան Ուժեր Կուսակցութեան միջեւ: Հաշտութիւնը հովանաւորեց Մարոնիներու Պատրիարք Քարտինալ Պըշարա Ռաաին:
Մինչ լիբանանեան քաղաքական բեմը կ՛ապրի երկուութիւններ եւ անհասկացողութիւններ, անցեալի ոխերիմ թշնամիներ Սուլէյման Ֆրանժիէ եւ Սամիր Ժաաժաա, ձեռք-ձեռքի տուին վերջ տալով 40 տարի տեւած թշնամական արիւնալի պատմութեան:
Այս առիթով ՌԱԿ Լիբանանի Շրջանային Վարչութիւնը կը շնորհաւորէ լիբանանցիները ընդհանրապէս եւ քրիստոնեաները մասնաւորաբար այս պատմական հաշտութեան առիթով, մաղթելով որ լիբանանցի բոլոր ղեկավարներն ալ նշեալ երկու մարդոցմէ օրինակ քաղեն:
Կը մնայ յուսալ, որ Լիբանանի պատմութեան մէջ բացուած ճերմակ էջերը իրենք ըլլան հիմնականը մինչ սեւ էջերը ըլլան բացառութիւն:
ՌԱԿ Լիբանանի Շրջանային Վարչութիւն
