29 Հոկտեմբեր-1 Նոյեմբեր 2018 թուականներուն Նի Եորքի Քուինս համալսարանի մէջ կայացաւ Ցեղաբանական եւ կրօնական հակամարտութիւններու կարգաւորման եւ խաղաղաշինութեան 2018ի ամէնամեայ միջազգային հինգերորդ գիտաժողովը («2018 Annual International Conference on Ethnic and Religious Conflict Resolution Peacebuilding»):
Գիտաժողովի եռօրեայ նիստերու ընթացքին աշխարհի տարբեր երկիրներէ աւելի քան 93 զեկուցողներ ներկայացուցին իրենց ուսումնասիրութիւնները, որոնք մատնանշեցին հակամարտութիւններու, ցեղաբանական կամ կրօնական անհանդուրժողականութենէ բխող խնդիրներու առնչութեամբ լուծման ուղղուած տեսակէտներ, եզրակացութիւններ ու առաջարկներ:
Գիտաժողովին մասնակցելու համար Հայաստանէն ժամանած էր Մեսրոպ Մաշտոցի անուան Մատենադարանի, Արաբատառ ձեռագրերու նկարագրութեան եւ գիտական թարգմանութեան բաժնի կրտսեր գիտաշխատող Վերա Սահակեան: Ան իր զեկոյցին մէջ անդրադարձաւ Հայոց ցեղասպանութեան վերաբերեալ Մատենադարանին մէջ պահուող օսմանեան վաւերագիրերէն՝ առանձնացնելով մէկը՝ իբրեւ Հայոց ցեղասպանութեան բացառիկ վկայութիւն: Սահակեան ներկայացուց նաեւ Թուրքիոյ վարչապետարանի օսմանեան արխիւներէն ձեռք բերուած նոյնիմաստ վաւերագիրեր, որոնք կը կրէին հայ որբերու բռնի կրօնափոխութեան մասին գաղտնի հրահանգներ:
Ցեղաբանական եւ կրօնական հակամարտութիւններու կարգաւորման եւ խաղաղաշինութեան 2018ի միջազգային գիտաժողովի նախագահը իր շնորհակալութեան խօսքի ընթացքին յատկապէս անդրադարձաւ Հայաստանի Հանրապետութեան Մաշտոցի անուան Մատերադարանին, որուն միջնորդութեամբ Հայաստանը իր աջակցութիւնը բերած էր միջազգային խաղաղաշինութեան ուղղուած այս նախաձեռնութեան:
Վերա Սահակեան Մատենադարանի Ցեղասպանութեան Վաւերագրերը Ներկայացուց Քուինս Համալսարանի Գիտաժողովին
