«ԶԱՐԹՕՆՔ», ԼԻԲԱՆԱՆ – Թրքական ընդդիմադիր «Պիրկիւն» պարբերականը դատի տուած են նախագահ Ռեճեփ Թայիփ Էրտողանը վիրաւորելու համար:
Այս մասին «Արմէնփրես»ի փոխանցմամբ կը յայտնէ թրքական «Diken» պարբերականը:
Թերթը դատի տուած են յօդուածի մը համար, ուր Էրտողանի անունը յիշատակուած է ընդամէնը մէկ նախադասութեան մէջ:
Մասնաւորապէս նշուած է, որ ֆինանսներու նախարարութեան նորանշանակ պաշտօնեաներէն՝ Ահմեդ Մինտերը Էրտողանի ազգականն է եւ որ ան իր դստերը ամուսնացուցած է Թուրքիոյ ներքին գործոց նախարար Սուլէյման Սոյլուի որդիին հետ:
Թերթին մէջ տեղ գտած յօդուածը կը վերաբերի Էրտողանի փեսային, Թուրքիոյ ֆինանսներու նախարար Պերաթ Ալպայրաքի՝ նախարարութեան մէջ կատարած նոր նշանակումներուն:
