«ԶԱՐԹՕՆՔ», ԼԻԲԱՆԱՆ – Թուրքիոյ նախագահ Ռեճեփ Թայիփ Էրտողան յայտարարած է, որ չ’ընդունիր Միացեալ Նահանգներու կողմէ Իրանի դէմ յայտարարուած պատժամիջոցները: Ինչպէս կը հաղորդէ «Արմէնփրես»ը, այս մասին կը յայտնէ թրքական «Անատոլու» գործակալութիւնը:
«Մենք պատժամիջոցները ճիշդ չենք համարեր, քանի որ մեր կարծիքով անոնք ուղղուած են խախտելու աշխարհի հաւասարակշռութիւնը: Բացի այդ՝ անոնք դէմ են իրաւունքին ու դիւանագիտութեան: Մենք չենք ցանկար ապրիլ կայսերապաշտ աշխարհի մէջ»,- լրագրողներու հետ զրոյցի ժամանակ ըսած է նախագահ Էրտողանը:
Նոյեմբեր 5էն ուժի մէջ մտած են Իրանի դէմ ԱՄՆ լայնամաշտաբ պատժամիջոցները, որոնք գլխաւորապէս կ’առնչուին ուժաբանութեան ու դրամատնային ոլորտներուն: Միացեալ Նահանգներու մէջ անցանկալի յայտարարուած են աւելի քան 700 անձ ու կազմակերպութիւն: Անոնք, որոնք կը համագործակցին այս ցուցակին մէջ յայտնուած անձանց կամ կազմակերպութիւններուն հետ, եւս կրնան յայտնուիլ ԱՄՆ պատժամիջոցներու տակ: Սակայն 7 երկրի համար ժամանակաւոր բացառութիւն կատարուած է. այդ երկիրներն են՝ Չինաստանը, Հնդկաստանը, Իտալիան, Յունաստանը, Ճափոնը, Հարաւային Քորէան եւ Թուրքիան:
