«ԶԱՐԹՕՆՔ», ԼԻԲԱՆԱՆ – Նոյեմբեր 6-ին, մօտ ժամը 08.25-ին, հրազէնային վիրաւորումէ զոհուած է ՊԲ կեդրոնական ենթակայութեան զօրամասերէն մէկու մը ժամկետային զինծառայող, 2000-ի ծնունդ Արիստակէս Էդուարդի Ազատեանը:
Ինչպէս կը տեղեկացնէ Արցախի շապտպանութեան նախարարութեան մամուլի ծառայութիւնը, N զօրամասի ժամկետային զինծառայող, շարքային Արիստակէս Ազատեանը զօրամասի հսկիչ անցագրային կէտէն շուրջ 70 մ հեռաւորութեամբ գտնուող երկաթեայ կամուրջին մօտ, իրեն ամրակցուած ԱԿ-74 տեսակի ինքնաձիգով, ծնօտին վրայ ինքն իրեն պատճառած է մահացու հրազէնային վիրաւորում:
Դէպքի առթիւ առաջին կայազօրային քննչական բաժնին մէջ ՀՀ քրէական օրէնսգիրքի 110-րդ յօդուածի 1-ին մասով յարուցուած է քրէական գործ, կը կատարուի նախաքննութիւն:
Արցախի Հանրապետութեան պաշտպանութեան նախարարութիւնը կը կիսէ կորստեան ծանր վիշտը եւ իր զօրակցութիւնը կը յայտնէ մահացած զինծառայողի ընտանիքի անդամներուն, հարազատներուն եւ ծառայակիցներուն:
