Կարգ մը լրատուական միջոցներ եւ ընկերային համացանցի օգտատէրեր Լիբանանի զբօսաշրջութեան նախարարի պաշտօնակատարին մէկ խօսքը հրապարակային քննարկումի առարկայ դարձուցած են, ինչ կը վերաբերի Եգիպտոսի Հանրապետութեան մասին նախարարին արտայայտած մէկ կարծիքին:
Այս առիթով ՌԱԿ Լիբանանի Շրջանային Վարչութիւնը կը շեշտէ, թէ խնդրոյ առարկայ նախարարին նպատակը վստահաբար Եգիպտոսը կամ եգիպտացի ժողովուրդը անպատուել չէր եւ իր խօսքը իր շրջագիծէն դուրս գալով սխալ մեկնաբանուած է լրատուական միջոցներու եւ համացանցի վրայ: Տեղին է սակայն նշել, որ ամէն պարագայի նախարարի խօսքը իր անձնական կարծիքն է, որուն համար ան չուշացաւ ներողութիւն խնդրել եգիպտական կողմէն:
Հիմնուելով վերոյիշեալին վրայ, ՌԱԿ Լիբանանի Շրջանային վարչութիւնը կոչ կ’ուղղէ բոլոր լրատուական միջոցներուն եւ ընկերային համացանցի օգտատէրերուն չշահագործել պատահած սխալը եւ փոխարէնը կեդրոնանալ աւելի շինիչ ու նպատակայարմար նիւթերու վրայ:
Եզրակացնելու համար, ՌԱԿ Լիբանանի Շրջանային Վարչութիւնը բարձր կը գնահատէ Լիբանանի պատմական եւ ռազմավարական կապերը Եգիպտոսի ու անոր ժողովուրդին հետ, որոնք ամէն բանէ վեր են ու կը մնան անխախտ:
Լրատուական Գրասենեակ
