«ԶԱՐԹՕՆՔ», ԼԻԲԱՆԱՆ – Ազգային ժողովի նախագահ Արա Պապլոյեան ուղերձ յղած է խորհրդարանի արձակման կապակցութեամբ: Ինչպէս կը փոխանցէ «Արմէնփրես»ը, ՀՀ Ազգային ժողովի լրատուութեան եւ հանրութեան հետ կապերու վարչութենէն կը տեղեկացնեն, որ ուղերձին մէջ մասնաւորապէս ըսուած է.
«Սիրելի՛ հայրենակիցներ, Հայաստանի Հանրապետութեան Ազգային ժողովի վեցերորդ գումարման յարգելի՛ պատգամաւորներ, Ազգային ժողովի աշխատակիցներ,
խորհրդարանը վարչապետի հրաժարականից եւ երկու անգամ վարչապետ չընտրուելուց յետոյ իրաւունքի ուժով սկսում է իր լիազօրութիւնների դադարեցման գործընթացը: Համաձայն Հայաստանի Հանրապետութեան Սահմանադրութեան՝ ներկայ խորհրդարանը կը գործի մինչեւ եօթերորդ գումարման Ազգային ժողովի առաջին նիստը:
Ակնյայտ է, որ Ազգային ժողովի վեցերորդ գումարման պատգամաւորական կազմն առանձնացաւ իր խոհեմութեամբ ու հանդուրժողականութեամբ: Դա մեր գործընկերների բարձր պրոֆեսիոնալիզմի, քաղաքական կամքի ու իմաստութեան արդիւնքն էր: Անցած մէկուկէս տարին լրիւ բաւական էր համոզուելու համար, որ մեր պատգամաւորներն ունեն սեփական դիմագիծ եւ ցանկացած խնդրում մինչեւ վերջ պաշտպանում են իրենց քաղաքական դիրքորոշումը: Բայց դժուարին պահերին, որոնք անցած ամիսներին քիչ չէին, յաճախ մի կողմ թողնելով կուսակցական շահերն ու տեսակէտները՝ բոլորը համախմբուեցին Հայաստանում ու Արցախում կայունութեան պահպանման գաղափարի շուրջ եւ երկիրը չտարան նորանոր ցնցումների:
Ուստի, շնորհակալութիւն եմ յայտնում Հայաստանի Հանրապետութեան Ազգային ժողովի բոլոր պատգամաւորներին՝ նման բարձր գիտակցութիւն ցուցաբերելու համար: Եւ, միաժամանակ, առանձնայատուկ շնորհակալութիւն եմ յայտնում յատկապէս ա՛յն պատգամաւորներին, ովքեր անկախ հին ու նոր իրողութիւններից այս ամէն օր փոփոխուող ժամանակներում չդաւաճանեցին իրենց սկզբունքներին եւ որոշումներ ընդունելիս առաջնորդուեցին իրենց խղճի ու ներքին համոզմունքների թելադրանքով: Դրա շնորհիւ էլ այս ամիսներին պահպանուեց ամենակարեւորը՝ ներքին ու արտաքին գործընթացների կանխատեսելիութիւնը, ինչը թոյլ տուեց երկրին, ժողովրդին ու բանակը յետ պահել մեծամեծ փորձութիւններից:
Սիրելի բարեկամներ,
2017 թուականի գարնանից ի վեր ստանձնելով խորհրդարանի ղեկավարումը՝ օրէնսդիր աշխատանքին զուգընթաց ձեռնամուխ էի եղել նաեւ Ազգային ժողովի աշխատակազմի կառուցուածքի բարեփոխմանը:
Իհարկէ, ափսոսում եմ, որ չհասցրեցինք իրականացնել մեր բոլոր ծրագրերը: Իսկ արածի արդիւնքներն արդէն տեսնում ենք եւ համոզուում, որ ընդունուած որոշումները ճիշդ էին ու տեղին: Մասնաւորապէս, Ազգային ժողովի նախագահի խորհրդականների ինստիտուտի պարզեցումը թոյլ տուեց աշխատել անմիջապէս Ազգային ժողովի աշխատակազմի տարբեր ստորաբաժանումների հետ ու բացայայտել եւ զարգացնել նրանց մասնագիտական մեծ հնարաւորութիւնները: Եւ այսօր, օգտուելով առիթից` շնորհակալութիւն եմ յայտնում Ազգային ժողովի ողջ աշխատակազմին՝ բարեխիղճ եւ արհեստավարժ աշխատանքի համար:
Միաժամանակ, շնորհակալութիւն եմ յայտնում նաեւ մամուլին եւ խորհրդարանում հաւատարմագրուած բոլոր լրագրողներին: Նրանք այս ընթացքում բարձր մակարդակով իրականացրեցին մեր աշխատանքների անկողմնակալ ու օպերատիւ լուսաբանումը եւ աւելին` յաճախ մատնացոյց արեցին հրատապ լուծում պահանջող տարբեր խնդիրներ ու ասես դարձան մեր օգնականներն ու խորհրդատուները:
Իսկ կառուցուածքային բարեփոխումների շրջագծում ամենամեծ ծրագիրն Ազգային ժողովի վերլուծական կենտրոնի ստեղծման նախաձեռնութիւնն էր: Մեր նպատակն էր ունենալ ընդունուած օրէնքների արդիւնաւէտութեան մշտադիտարկման ապահովումը, վերլուծութիւնն ու գնահատումն իրականացնող, ինչպէս նաեւ ցանկացած ասպարէզում միջազգային օրէնսդրական փորձն ու աւանդոյթները Հայաստանում կիրառելու հնարաւորութեան վերաբերեալ հիմնաւորուած առաջարկներ ներկայացնող մարմին: Լիայոյս եմ, որ ապագայ խորհրդարանն ու նրա ղեկավարութիւնը հետամուտ կը լինեն այս գրեթէ աւարտուն նախաձեռնութիւնը վերջնականապէս կեանքի կոչելուն:
Յարգելի՛ պատգամաւորներ,
Սիրելի՛ հայրենակիցներ,
Աւարտելով խօսքս՝ պարզ ու անկեղծ ասում եմ հետեւեալը. իմ կեանքի ուղեկիցը միշտ եղել է պատասխանատուութիւնը: Այն կրել եմ, երբ պարզապէս բժիշկ էի, բժշկական կենտրոնի ղեկավար, առողջապահութեան նախարար եւ տասը տարի Ազգային ժողովի մշտական յանձնաժողովի նախագահ, անդաւաճան ընկերս` պատասխանատուութիւնը, կրկին ինձ հետ էր ու վերահսկում էր ինձ:
Իսկ որպէս Հայաստանի խորհրդարանի նախագահ՝ իմ պատասխանատուութիւնն աւելի է ընդգծուել:
Ըստ այդմ, երբ արդէն պարզ էր քաղաքական գործընթացների զարգացման տրամաբանութիւնը, առաջին հայեացքից ամենաճիշդ եւ ընկալելի քայլը, որպէս խորհրդարանում ներկայացուած ամենամեծ քաղաքական ուժի ներկայացուցիչ` լինելու էր իմ հրաժարականը:
Բայց ընդհակառակը: Դարձեալ առաջնորդուել եմ նոյն պատասխանատուութեամբ, քանի որ կարծել եմ, որ իմ հրաժարականը կարող էր առաջացնել աւելորդ դժուարութիւններ:
Ի դէպ, Ազգային ժողովի իւրաքանչիւր խմբակցութիւն ունէր ինձ անվստահութիւն յայտնելու իրաւունք: Շնորհակալութիւն եմ յայտնում բոլոր խմբակցութիւններին ցուցաբերած բարձր վստահութեան համար, ինչը կրկնապատկեց իմ պատասխանատուութիւնը:
Սիրելի բարեկամներ,
Չեմ թաքցնում, որ ափսոսանքով ու մտահոգութեամբ եմ հեռանալու՝ մտածելով, թէ արդեօ՞ք աւարտին են հասցուելու այն մտայղացումները, որոնք սկսել էի. օրէնսդրական նախաձեռնութիւններ, միջազգային համագործակցութիւն, խորհրդարանական դիւանագիտութիւն, կառուցուածքային բարեփոխումներ եւ այլն: Յուսանք, որ ամէն ինչ լաւ կը լինի:
Հայաստանի Հանրապետութեան եօթերորդ գումարման խորհրդարանին մաղթում եմ օրինաստեղծ արդիւնաւէտ աշխատանք եւ ամենակարեւորը՝ պատասխանատուութիւն»:
