«ԶԱՐԹՕՆՔ», ՊԷՅՐՈՒԹ – Ազգային ժողովի «Ելք» խմբակցութիւնը որոշած է Նիկոլ Փաշինեանի թեկնածութիւնը առաջադրել Հայաստանի Հանրապետութեան վարչապետի պաշտօնին: «Արմէնփրես»-ի հաղորդմամբ` լրագրողներուն յայտնեց Ազգային ժողովի «Ելք» խմբակցութեան պատգամաւոր Գէորգ Գորգիսեան:
«Իրաւաբաններու հետ խորհրդկացութեան արդիւնքով որոշեցինք վարչապետի թեկնածու առաջադրել»,-ըսաւ Գորգիսեան:
Անոր խօսքով` նման որոշում առած են իրաւական գործընթացը ապահովելու համար:
ՀՀ վարչապետի ընտրութիւնը ԱԺ-ի մէջ տեղի պիտի ունենայ Հոկտեմբեր 24-ին: Այլ խմբակցութիւններէ դեռ թեկնածու չեն առաջադրած:
Մինչ այդ տեղին է յիշեցնել, թէ Երկուշաբթի օր Հայաստանի Ազգային ժողովը քուէարկութեան դրած էր կառավարութեան կողմէ ներկայացուած Ընտրական օրէնսգիրքի բարեփոխումներու նախագիծը: Փոփոխութիւններու նախագիծին թեր քուէարկեց 56 պատգամաւոր, մինչդեռ օրէնքը ընդունելու համար անհրաժեշտ էր 63 ձայն: Դէմ քուէարկեց 3 պատգամաւոր:
