«ԶԱՐԹՕՆՔ», ՊԷՅՐՈՒԹ – Հայաստանի Ազգային ժողովի նախագահ Արա Պապլոյեան շնորհաւորական ուղերձ յղած է Երեւանի հիմնադրման 2800րդ տարեդարձին առթիւ։ Այս մասին, ինչպէս կը փոխանցէ «Արմէնփրես»ը, ՀՀ ԱԺ լրատուութեան եւ հանրութեան հետ կապերու վարչութենէն։
«Սիրելի հայրենակիցներ,
Սրտանց շնորհաւորում եմ Երեւանի հիմնադրման 2800րդ տարեդարձի առթիւ: Երեւանը բերդաքաղաքից վաղուց դարձել է Արարատի հայեացքի ներքոյ տարածուած եւ արագ զարգացող մեծ ու գեղեցիկ քաղաք, ռազմապաշտպանական կառոյցից վերածուել է քաղաքաշինութեան ասպարէզում իրականացուած սխրանքի, ձեռք է բերել թամանեանական եզակի ճարտարապետական դիմագիծ, ստեղծել է իր իւրայատուկ՝ երեւանեան միջավայրը, եւ ի վերջոյ, այն այլեւս համայն հայութեան մայրաքաղաքն է: Ու նաեւ դարձել է բոլորիս սիրոյ, հոգատարութեան եւ հպարտութեան առարկան, որի զարգացումը խորհրդանշեց Հայաստանի ու հայութեան վերազարթօնքը:
Երեւանն այսօր ո´չ միայն Հայաստանի վարչական կենտրոնն է, այլեւ տնտեսական, գիտական, կրթական ու մշակութային մայրաքաղաքը, ուր միաձուլուել են պատմութեան բազմաթիւ շերտեր, եւ ուր, գոնէ վերջին հարիւրամեակում, զարգացել է հայ հասարակական-քաղաքական միտքը, ձեւակերպել է համահայկական ընդգրկում ունեցող նորանոր գաղափարներ եւ իրականութիւն դարձրել դրանք:
Երեւանն այսօր աշխարհի շատ ու շատ պետութիւնների կայուն զարգացման ճանապարհով ընթացող մայրաքաղաքների շարքում է, ապրում է նոր ժամանակների շնչով, միշտ զարմացնում է իր դասական գեղեցկութեամբ ու կոլորիտով:
Տօնական այս օրը յետադարձ հայեացք նետելով Երեւանի անցած քսանութ դարերին եւ երախտագիտութեամբ յիշելով մեր քաղաքը կառուցողներին ու շէնացնողներին` շնորհակալութեան առանձնայատուկ խօսքեր պիտի ուղղենք նաեւ բոլոր ա´յն մարդկանց, ովքեր իրենց տքնաջան աշխատանքով ամէն ինչ անում են մայրաքաղաքի զարգացման ու գեղեցկացման, Երեւանը քաղաքային կեանքի բոլոր ոլորտներում ու համայնքային կառավարման ասպարէզում նորարարական մօտեցումների կենտրոն դարձնելու եւ դրանք Հայաստանի միւս բնակավայրերում կեանքի կոչելու համար:
Երեւանի ծաղկման համար Հայաստանը շատ բան է արել, բայց Երեւանն էլ շռայլօրէն փոխհատուցել է այն, եւ որպէս մայրաքաղաք՝ ուղենիշ է դարձել ողջ երկրի զարգացման համար` իր կրթական, բժշկական, գիտական, արդիւնաբերական եւ միւս ասպարէզների մեծ հնարաւորութիւնները ծառայեցնելով հեռու ու մօտիկ, մեծ ու փոքր բնակավայրերի զարգացմանը:
Սիրելի հայրենակիցներ,
Այսօր բոլորիս տօնն է եւ Հայաստանի Հանրապետութեան խորհրդարանի ու իմ անունից կրկին շնորհաւորում եմ Երեւանի հիմնադրման 2800րդ տարեդարձի առթիւ:
Հպարտանանք մեր մայրաքաղաքի պատմութեամբ, գնահատենք ու պահպանենք ներկան եւ կերտենք Երեւանի վաղուայ օրը»,- նշուած է ՀՀ ԱԺ նախագահի ուղերձին մէջ:
