«ԶԱՐԹՕՆՔ», ՊԷՅՐՈՒԹ –Հայաստանի Հանրապետութեան նախագահ Արմէն Սարգսեան երէկ ընդունած է Երեւանի քաղաքապետ Հայկ Մարութեանը: Ինչպէս կը փոխանցէ «Արմէնփրես»ը, ՀՀ նախագահի աշխատակազմի հասարակայնութեան հետ կապերու վարչութենէն կը տեղեկացնեն, որ նախագահը անգամ մը եւս շնորհաւորած է նորընտիր քաղաքապետը, մաղթած է արդիւնաւէտ աշխատանք՝ ի շահ մայրաքաղաքի զարգացման եւ անոր բնակիչներու բարեկեցութեան:
Նախագահն ու քաղաքապետը միտքեր փոխանակած են մայրաքաղաքի զարգացման հեռանկարներուն, ընթացիկ ու ապագայ ծրագիրներու շուրջ: Հայկ Մարութեանը նախագահին տեղեկութիւններ ներկայացուցած է Երեւանի 2800ամեակի տօնակատարութիւններուն մասին:
Հանդիպումէն ետք նախագահն ու քաղաքապետը այցելած են «Երեւան, իմ սէր» հիմնադրամ: Շրջայցի ընթացքին քաղաքապետը ծանօթացած է հիմնադրամի գործունէութեան ու ծրագիրներուն:
