Պրն. Նազարէթ Գեւոնեան
Նուիրատու–բարերարը
ՆՈՐ ՕՐ, ԼՈՍ ԱՆՃԵԼԸՍ.- Հայ ժողովուրդի պատմութեան մէջ ունեցած ենք բազմաթիւ բարեգործներ. բարեգործութիւնը անհատի մը ազնուագոյն առաքինութիւններէն մէկն է:
Ունեցած ենք նաեւ անձնաւորութիւններ, որոնց նուիրատուութիւնները պայմանաւորուած են շահադիտական ակնկալութիւններով. այդ տեսակի նուիրատուներ առեւտրական մտայնութեան վրայ կարելի չէ բարերատուութիւն նկատել: Բարեսիրութեան քանակը չէ որ կ’արժեւորէ այդ արարքը: Յիշենք «Որբեւայրիի լուման», նուիրատուին նպատակը, ոգին եւ
իր համեստութիւնն է որ զինք կ’արժեւորէ «Բարերարի» կոչումին:
Պրն. Նազարէթ Գեւոնեան փոխնախագահն է «Երկիր եւ մշակոյթ» կազմակերպութեան: Ան իր նիւթաբարոյական օժանդակութիւններով նկատուած է այդ կազմակերպութեան ողնասիւներէն մէկը, որ բազմաթիւ ազգաշէն ծրագիրներ իրագործած է, անաղմուկ ու առանց շեփորումի: Պրն. Գեւոնեան կը հաւատայ որ հայապահպանումի կարեւոր ազդակներէն են հայ մշակոյթը եւ երկիրը (Հայրենիքը): Ան բազմաթիւ նուիրատուութիւններ կատարած է եւ օգտակար եղած է զանազան մշակութային կազմակերպութիւններու, այլազան ծրագիրներու իրագործման ի Հայաստան եւ ի սփիւռս աշխարհի:
Պրն. Գեւոնեան լաւատեղեակ ըլլալով ՀԲԸ Միութեան «Գրիգոր Սաթամեան» թատերախումբի բեմադրութիւններուն եւ մշակութային այլազան ձեռնարկներուն, ինքնակամ ու սրտաբուխօրէն փափաքած է մեծագումար նուիրատուութիւն մը կատարել, հայ մշակոյթի եւ արուեստի ջահը վառ պահելու համար այս փոթորկալից ովկիանոսին մէջ:
Ան կը փափաքի որ ՀԲԸ Միութեան «Գրիգոր Սաթամեան» թատերախումբի վարչութիւնը մասնայատուկ աշխատանքի ձեռնարկէ հայ երիտասարդ տաղանդներ յայտնաբերելով եւ թիկունք կանգնելով ու քաջալերելով զանոնք որպէսզի կարենան հասնիլ նախանձելի մակարդակի:
Պրն. Գեւոնեան պատրաստ է նիւթաբարոյական օժանդակութեամբ օկտակար դառնալու վերոյիշեալ ծրագրի իրագործման:
Կը փափաքիմ իր ներողամտութիւնը խնդրել, եթէ այս գրութեամբ իր համեստութիւնը վիրաւորած ըլլամ: Այս գրութեան նպատակը զինք փառաբանել չէ, ինք պէտք չունի գովասանքի, այլ մեր գաղութին մէջ գտնուող բազմահարիւր բարեկեցիկ անձնաւորութիւններ իր օրինակին հետեւելով, նպաստեն բոլոր ազգանուէր կազմակերպութիւններուն, անխտիր, օժանդակելով հայապահպանման առաքելութեան:
Կանխայատ շնորհակալութիւններով եւ առողջութեան լաւագոյն մաղթանքներով,
Ջերմօրէն՝ Հ. ՄԵՂՐՈՒՆԻ
Լոս Անճելըս, Հոկտեմբեր 2018
