Պոլսոյ հայոց պատրիարքարանը պաշտօնական կայքէջին մէջ հրապարակուած յայտարարութեան միջոցով հերքած է Արեւմտեան Հայաստանի պատմական Սասուն գաւառի գիւղերէն մէկուն մէջ 2000 քրիստոնեայ հայեր գտնուելու ու մկրտութիւններու եւ հարսանիքներու համար պատրիարքարանէն քահանայ պահանջելու մասին լուրերը:
Յայտարարութեան մէջ շեշտուած է, որ «Արեւելք» լրատուականի կողմէ նախապէս տարածուած լուրը Պոլսոյ հայոց պատրիարքարանին մէջ ընթերցած են մեծ զարմանքով: Պատրիարքարանէն յայտնած են, որ նման դիմում եւ պահանջ մինչեւ այսօր չեն ստացած, իսկ Սասունի մէջ իսլամացուած հայերէն բացի այժմ կ’ապրին ոչ թէ 2000, այլ միայն քանի մը քրիստոնեայ հայ ընտանիքներ:
Պատրիարքարանի ներկայացուցիչները նաեւ ընդգծած են, որ տարածուած լուրերէն ետք տեղեկութիւնը ճշդած են Սասունի հայերէն, որոնք յայտնած են, թէ նման գիւղ այդ տարածքին մէջ գոյութիւն չունի:
Կայքին մէջ նշուած է նաեւ, որ Սասունի հայերու համայնքը կը դասուի Թուրքիոյ տարածքին գործող եկեղեցի չունեցող հայկական 17 համայնքներու շարքին, իսկ գործող եկեղեցի ու որպէս քրիստոնէական համայնք արձանագրուած հայկական միակ գիւղը Թուրքիոյ մէջ Վաքըֆն է:
