«ԶԱՐԹՕՆՔ», ՊԷՅՐՈՒԹ –Վարչապետ Նիկոլ Փաշինեան եւ տիկին Աննա Յակոբեանը ՀՀ նախագահ Արմէն Սարգսեանի, տիկին Նունէ Սարգսեանի եւ Ն.Ս.Օ.Տ.Տ. Ամենայն հայոց կաթողիկոս Գարեգին երկրորդի հետ ներկայ գտնուած են հայազգի աշխարհահռչակ շանսոնիէ Շառլ Ազնաւուրի հոգեհանգիստի արարողութեան, որ տեղի ունեցած է Փարիզի Ինվալիտներու պալատին մէջ (Hotel des Invalides): Ինչպէս կը փոխանցէ «Արմէնփրես»-ը, ՀՀ վարչապետի աշխատակազմի տեղեկատուութեան եւ հասարակայնութեան հետ կապերու վարչութենէն, միջոցառումին ներկայ եղած են Ֆրանսայի նախագահ Էմմանուէլ Մաքրոնը, տիկին Պրիճիթ Մաքրոնը, Ֆրանսայի նախկին նախագահներ` Նիքոլա Սարքոզին եւ Ֆրանսուա Օլանտը, Ֆրանսայի վարչապետ Ֆիլիփ Էտուարտը, Ֆրանսայի հասարակական, քաղաքական, մշակութային յայտնի գործիչներ, Ֆրանսայի հայ համայնքի ներկայացուցիչներ:
Ֆրանսայի Ազգային նուագախումբի կատարումով նախ հնչած են Հայաստանի եւ Ֆրանսայի ազգային օրհներգերը, որմէ ետք վարչապետ Փաշինեան եւ Էմմանուէլ Մաքրոնը մօտեցած են Շառլ Ազնաւուրի ընտանիքի անդամներուն եւ իրենց ցաւակցութիւնները յայտնած անոնց:
