«ԶԱՐԹՕՆՔ», ՊԷՅՐՈՒԹ –Թուրքիոյ իշխանութիւնները կը շարունակեն տարբեր շինծու մեղադրանքներով ձերբակալել, ազատազրկումի դատապարտել իշխանութիւններու քաղաքականութիւնը քննադատող կամ տարբեր կարծիք ունեցող լրագրողական համայնքի ներկայացուցիչները: Այս մասին, ինչպէս կը հաղորդէ «Արմէնփրես»-ը, կը յայտնէ թրքական artigercek.com-ը:
Միայն 2018-ի Սեպտեմբեր ամսուան ընթացքին դատարանին առջեւ կանգնած է 110 լրագրող, որոնցմէ 5-ն դատապարտուած է 21-ական տարուան ազատազրկումի:
«Ազատ լրագրողներու նախաձեռնութեան» տուեալներուն համաձայն՝ ներկայիս թրքական բանտերու մէջ կը գտնուին 173 լրագրողներ: Բազմաթիւ լրագրողներ ալ կը սպասեն իրենց դատական վճիռներուն:
Թուրքիոյ մէջ լրագրողներու նկատմամբ ճնշումներն ու անոնց ձերբակալութիւնները յատկապէս մեծ թափ առած են 2016-ին Թուրքիոյ մէջ տեղի ունեցած ռազմական յեղաշրջումի փորձին յաջորդած շրջանին:
Ձերբակալուած լրագրողները հիմնականօրէն կը մեղադրուին ահաբեկչական կազմակերպութիւններու քարոզ իրականացնելու կամ ալ կիւլենականութեան շինծու մեղադրանքներով:
Միջազգային հեղինակաւոր կազմակերպութիւններն ու իրաւապաշտպանները Թուրքիոյ իշխանութիւններուն պարբերաբար կոչ կ’ընեն ազատ արձակելու ձերբակալուած լրագրողները եւ դադրեցնելու անոնց նկատմամբ իրականացուող հետապնդումները, սակայն ապարդիւն:
