«ԶԱՐԹՕՆՔ», ՊԷՅՐՈՒԹ –Թուրքիոյ նախագահ Ռեճեփ Թայիփ Էրտողան չի բացառեր ԵՄ անդամակցութեան շուրջ բանակցութիւններուն շարունակականութեան հարցը հանրաքուէի դնելու հնարաւորութիւնը:
Այս մասին, ինչպէս կը հաղորդէ «Արմէնփրես»-ը, կը յայտնէ թրքական «Անատոլու» գործակալութիւնը:
Էրտողանի փոխանցմամբ՝ 1963-էն ի վեր ԵՄ-ը կը խաբէ Թուրքիան եւ կը պահէ անորոշութեան մէջ:
«Մենք շատ բան ունինք տալու ԵՄ-ին, սակայն 1963-էն ի վեր մեզ կը խաբեն: Թերեւս ԵՄ-ը նոյնպէս շատ բան ունի մեզի տալու, բայց եթէ այսպէս շարունակուի մեզի կը մնայ հարցնել մեր 81 մլն ժողովուրդին»,- ակնարկած է նախագահը այդ հարցով հանրաքուէի իրականացման հնարաւորութեան:
TRT World Forum գիտաժողովի ժամանակ ունեցած ելոյթին Էրտողանը նաեւ կարծիք յայտնած է, որ Եւրամիութիւնը «կը մօտենայ իր պատմութեան աւարտին»:
Թուրքիոյ Հանրապետութիւնը 1963-ին ԵՄ-ի հետ համաձայնագիր ստորագրած է, 1987-ին ԵՄ անդամ դառնալու յայտ ներկայացուցած է, 1999-ին դարձած է ԵՄ անդամակցութեան թեկնածու, սակայն մինչ օրս ԵՄ անդամ չէ դարձած:
