ՆՈՐ ՕՐ, ԼՈՍ ԱՆՃԵԼԸՍ – Ուրբաթ, 21 Սեպտեմբերին Մեքսիքոյի Մորելիա քաղաքին մէջ տեղի ունեցան Հայաստանի Հանրապետութեան անկախութեան 27-րդ տարեդարձի պաշտօնական միջոցառումները։
Մեքսիքոյի մէջ առաջին միջոցառումը Հայաստանի նորանշանակ պատուոյ հիւպատոսի գրասենեակին բացումն էր, որ կատարեց Տ. Սասուն Ծ. Վրդ. Զմրուխտեանը, ներկայացնելով Հիւսիսային Ամերիկայի Արեւմտեան թեմի և Մեքսիքոյի առաջնորդ Գերշ. Տ. Յովնան Արք. Տէրտէրեանը։ Ներկայ էր նաև Մեքսիքոյի Հայաստանի Հանրապետութեան արտակարգ և լիազօր դեսպան Պրն. Արա Այվազեանն ու անոր տիկինը՝ Գայիանէն և աշխատակազմը, ինչպէս նաև մասնաւոր հրաւիրուած հիւրեր։
Երկրորդը՝ նոյն օրը երեկոյեան, Մորելիա քաղաքի գլխաւոր Մշակութային հահլիճին մէջ տեղի ունեցաւ Հայաստանի Հանրապետութեան անկախութեան 27-րդ տարեդարձի միջոցառումը, որ կազմակերպուած էր Մեքսիքոյի Հայաստանի Հանրապետութեան դեսպանատան եւ Մեքսիքոյի նորանշանակ պատուոյ հիւպատոս Պրն. Ժաք (Յակոբ) Սահակեանի կողմէ։ Ներկայ էին նահանգային, քաղաքի և հասարակական կազմակերպութիւններու նախագահներ, պաշտօնեաներ և բազմաթիւ հիւրեր։
Միջոցառման ընթացքին դեսպան Պրն. Արա Այվազեան պաշտօնապէս ներկայացուց Պրն. Ժաք Սահակեանը իբրև Միչուական նահանգի, Մորելիա քաղաքի Հայաստանի Հանրապետութեան պատուոյ հիւպատոս։ Տ. Սասուն Ծ. Վրդ. Զմրուխտեան պաշտօնապէս ընթերցեց Տ. Յովնան Արք. Տէրտէրեանի շնորհաւորկան նամակը և նաեւ փոխանցեց իր սրտի խօսքը։ Յաջորդաբար ելոյթ ունեցան տարբեր բարձրաստիճան նահանգային պաշտօնեաներ, սենատորներ և տարբեր կազմակերպութիւններու նախագահներ, շնորհաւորելով Հայաստանի տարեդարձը եւ Սահակեանի նշանակումը։
Երեկոն աւարտեցաւ հիւրասիրութեամբ, հայկական պարով և երգեցողութեամբ, մեքսիքացի արուեստագէտներու կատարմամբ։
