«ԶԱՐԹՕՆՔ», ՊԷՅՐՈՒԹ – Նախագահ Միշէլ Աուն Երեքշաբթի Աւստրիոյ արտաքին գործոց նախարար Քարին Քնէյսըլի հետ հանդիպումին յայտարարեց, որ Լիբանանը աներկբայօրէն դիմակայութիւն պիտի ցուցաբերէ իր ինքնիշխանութեան սպառնացող իսրայէլական որեւէ զաւթողական արարքի առթիւ: Այս մասին կը հաղորդեն Աունի նախագահական գրասենեակէն:
Պաապտայի նախագահական պալատին մէջ Աուն խստօրէն քննադատեց Իսրայէլի վարչապետ Պենճամին Նաթանիահուի վերջին պնդումները, թէ Ռաֆիք Հարիրի օդակայանին յարակից հրթիռակայան հաստատուած է Հըզպալլայի կողմէ:
Յայտարարութեան մէջ կը նշուի, որ Աուն բացառած է նման հրթիռակայանի մը գոյութիւնը եւ այդ մասին Իսրայէլի վարչապետի պնդումները որակած է անհիմն եւ իրականութեան ամենեւին չհամապատասխանող: Աւելին, նախագահ Միշէլ Աուն այդ պնդումները դիտարկած է իբրեւ իսրայէլական նոր սպառնալիք Լիբանանի ինքնիշխանութեան:
Լիբանան Դիմակայութիւն Պիտի Ցուցաբերէ Իսրայէլական Որեւէ Զաւթողական Արարքի Պարագային. Աուն
