«ԶԱՐԹՕՆՔ», ՊԷՅՐՈՒԹ – ՌԴ նախագահ Վլատիմիր Փութինին առհասարակ աւելի շատ կը վստահին, քան ԱՄՆ-ի նախագահ Տոնալտ Թրամփին: Այդ մասին, ինչպէս կը փոխանցէ «Արմէնփրես»-ը, կը վկայեն Pew Research Center ամերիկեան հետազօտական կեդրոնի կողմէ ուղղուած հարցումի արդիւնքները:
Հարցումի տուեալներուն համաձայն՝ մասնակիցներու 30 տոկոսը վստահութեամբ կը վերաբերի Ռուսիոյ նախագահին՝ նշելով անոր ճիշդ քաղաքականութիւնը միջազգային ասպարէզին մէջ: Այդ հարցի գծով աւելի բարձր ցուցանիշ ունի Չինաստանի նախագահ Սի Ցզինփինը: Իր վստահութեան վարկանիշը կը կազմէ 34 տոկոս: Թրամփի այդ ցուցանիշը 27 տոկոս է, իսկ աշխարհի բոլոր ղեկավարներու շարքին վստահութեան ամենաբարձր վարկանիշը ունի Գերմանիոյ վարչապետ Անկելա Մերքելը՝ 52 տոկոս:
Միաժամանակ, հետազօտութեան համաձայն, հարցումին պատասխանող անձանց մեծամասնութիւնը անհանգստութիւն կը յայտնէ միջազգային ասպարէզին մէջ ԱՄՆ-ի դերակատարութեան կապակցութեամբ: Իրենց կարծիքով՝ Միացեալ Նահանգները յաճախ կը քամահրէ միւս երկիրներու կարծիքը համաշխարհային կարեւոր խնդիրներու լուծման գործին մէջ: Ոմանք կը նշեն, որ ԱՄՆ-ը սկսած է նուազ ջանքեր գործադրել համաշխարհային խնդիրներու կարգաւորման համար, քան առաջ: Ասոր հետ մէկտեղ, ինչպէս կը վկայեն հարցումի արդիւնքները, աւելի ու աւելի շատ մարդիկ իրենց հաւանութիւնը կ’արտայայտեն համաշխարհային ասպարէզին մէջ Չինաստանի քաղաքականութեան: Հարցումին պատասխանած է 26,1 հազար մարդ աշխարհի 25 երկրէ 2018 թուականի Մայիս 20-էն մինչեւ Օգոստոս 12 ժամանակահատուածին, հաղորդած է «ՌԻԱ Նովոսթի»-ն:
