«ԶԱՐԹՕՆՔ», ՊԷՅՐՈՒԹ – Հայաստանի Հանրապետութեան նախագահ Արմէն Սարգսեան ուղերձ յղած է Երեւանի աւագանիի ընտրութիւններուն առթիւ: Ինչպէս կը փոխանցէ «Արմէնփրես»-ը, ՀՀ նախագահի աշխատակազմի հասարակայնութեան հետ կապերու վարչութենէն կը տեղեկացնեն, որ ուղերձին մէջ մասնաւորապէս ըսուած է.
«Յարգելի՛ հայրենակիցներ, Կենտրոնական ընտրական յանձնաժողովն ամփոփեց Երեւանի աւագանու արտահերթ ընտրութիւնների վերջնական արդիւնքները: Շնորհաւորում եմ ընտրութիւնները սահմանադրական նորմերին եւ սկզբունքներին համահունչ իրականացնելու առթիւ:
Սա նոր Հայաստանի առաջին քայլն է ընտրական գործընթացի արմատական բարելաւման ուղղութեամբ, որը հիմք կարող է ծառայել յաջորդ ընտրութիւնները հանրային վստահութեան առաւել համերաշխ մթնոլորտում անցկացնելու համար։ Այս առումով բարձր եմ գնահատում մրցակից դաշինքների եւ կուսակցութիւնների, ինչպէս նաեւ ընտրութեանը չմասնակցած քաղաքական ուժերի կեցուածքը, որոնք ընդունեցին ընտրութեան արդիւնքները եւ շնորհաւորեցին յաղթած ուժին։
«Իմ քայլը» կուսակցութիւնների դաշինքի բարձր ցուցանիշները մեծ պատասխանատուութիւն են դնում նրա ղեկավարների, մասնաւորապէս ապագայ քաղաքապետի վրայ: «Բարգաւաճ Հայաստան» կուսակցութեանը եւ «Լոյս» կուսակցութիւնների դաշինքին նոյնպէս սպասուում է լուրջ եւ ծաւալուն աշխատանք աւագանու ներսում՝ ապահովելու համար կարծիքների բազմազանութիւնն ու հաւասարակշռութիւնը:
Մաղթում եմ Երեւանի նոր իշխանութիւններին արդիւնաւէտ աշխատանք՝ յանուն մայրաքաղաքի շէնացման եւ նրա բնակիչների բարեկեցութեան աճի»:
