Լիբանանի տեղեկատուական նախարարի պաշտօնակատար Մըլհեմ Ռիաշի Երկուշաբթի կոչ ըրաւ շարք մը օրինագիծերու գործարկման, որով կարելի ըլլայ հնարաւորինս նպաստել մամլոյ անյուսալի մարզի ներկայ ճգնաժամի հանգուցալուծման: Օրինագիծը առաջին հերթին պիտի ներկայացուի ժամանակաւորապէս գործող նախարարաց խորհուրդին, այնուհետեւ խորհրդարանին:
Տեղեկատուական նախարարի պաշտօնակատար Մըլհեմ Ռիաշի հանդիպում ունեցաւ զանազան օրաթերթերու խմբագիրներուն հետ: Զրուցակիցները քննարկեցին տպագիր մամլոյ հետ կապուած առկայ ճգնաժամը վերացնելու ուղիներ, յատկապէս այն իրողութենէն ետք, երբ տասնամեակներու վաղեմիութիւն ունեցող լիբանանեան օրաթերթերէն մէկը հարկադրաբար փակուեցաւ Երկուշաբթի նիւթական դժուարութիւններու պատճառով:
