«ԶԱՐԹՕՆՔ», ՊԷՅՐՈՒԹ – Քրասնոյարսքի 51-ամեայ բնակիչը Նովոսիպիրսք-Պաքու չուերթի ժամանակ սպառնացած է պայթեցնել օդանաւը:
Այս մասին, ինչպէս կը հաղորդէ «Արմէնփրես»–ը, կը յայտնեն ազրպէյճանական լրատուամիջոցները:
Սպառնալիքի պատճառը եղած է այն, որ օդանաւի անձնակազմը հրաժարած է տղամարդուն առեւտրական դասին մէջ նստեցնել:
Նովոսիպիրսքի «Տոլմաչովօ» օդակայանի ոստիկանութիւնը տեղեկութիւն ստացած է, որ ուղեւորներէն մէկը յայտնած է պայթումի սպառնալիքի մասին:
Օդանաւի ուղեւորները տարհանուած են, օդանաւը, ուղեւորներն ու անոնց ուղեբեռը անցած են կրկնակի ստուգում: Պայթուցիկ սարքեր չեն յայտնաբերուած, որմէ ետք օդանաւը ուղեւորուած է Պաքու:
Դէպքին առթիւ յարուցուած է քրէական գործ՝ ահաբեկչութեան մասին կեղծ հաղորդագրութիւն տարածելու յատկանիշներով:
