Կիրակի, 21. 07. 2024

spot_img

«ՌԱԿ Մամուլ» Հիմնադրամի Օժանդակութեամբ՝ «Զարթօնք» Պիտի Հրատարակէ Իր Նորահաստատ Մատենաշարի Առաջինը

Զրոյց՝ «ՌԱԿ ՄԱՄՈՒԼ» Հիմնադրամի Տնօրէնուհիին Հետ

Զրոյցը վարեց՝

ՏԱԹԵՒԻԿ ՍԱՐԳՍԵԱՆ

«Զարթօնք»ի Երեւանի Աշխատակից

Առաջին անգամը չէ, որ «Զարթօնք» կ’ունենայ իր գրքային հրատարակութիւնը: Անոնց գլուխ գործոցը կը հանդիսանայ անշուշտ Գերսամ Ահարոնեանի «Յուշամատեան Մեծ Եղեռնի» կոթողային գործը: Սակայն իր 81րդ տարեդարձին առիթով այս տարի հիմը կը դրուի «Զարթօնք» մատենաշարին, որուն անդրանիկ հրատարակութեան կը սատարէ «ՌԱԿ ՄԱՄՈՒԼ» հիմնադրամը:

Առիթէն օգտուելով կարճ զրոյց մը ունեցանք հիմնադրամի տնօրէնուհի Ճէնի Գրիգորեան Բարսեղեանի հետ:

  • Կրնա՞ք համառօտ կերպով ներկայացնել «ՌԱԿ ՄԱՄՈՒԼ» հիմնադրամի նպատակը:
  • «ՌԱԿ ՄԱՄՈՒԼ» հիմնադրամը 2017 թուականին Հայաստանի Հանրապետութեան մէջ հիմնուած եւ ՀՀ արդարադատութեան նախարարութեան մօտ գրանցուած ոչ առեւտրական կազմակերպութիւն մըն է: Ան ունի իր հոգաբարձուներու խորհուրդը, որ կազմուած է շարք  մը համախոհ անձնաւորութիւններէ, որոնց նպատակն է հայ մամուլը միշտ պատնէշի վրայ պահել: «ՌԱԿ ՄԱՄՈՒԼ» հիմնադրամի կարեւորագոյն նպատակներէն է սատարել հայրենի թէ աշխարհասփիւռ հայատառ մամուլի զարգացման ու վերելքին: 

 

  • Ձեր նշած նպատակին ծիրէն ներս առ այսօր ի՞նչ իրագործած է հիմնադրամը:
  • Որովհետեւ պէտք է միշտ սկսիլ ինքզինք եւ իւրայինը զարգացնելով, «ՌԱԿ ՄԱՄՈՒԼ» հիմնադրամի օժանդակութեամբ ragmamoul.net կայքը զարգացման ու վերելքի ընթացքին մէջ է: Ան հանդէս կու գայ արդէն հինգ լեզուներով: Անոր ցանցին մէջ տեղ գտած են Ռամկավար Ազատական շարք մը օրկաններ, որոնց ելեկտրոնային տարբերակը լոյս կը տեսնէ ու կը տարածուի նշեալ կայքին միջոցաւ:

 

  • Ուրիշ ի՞նչ ծրագիրներու վրայ կ’աշխատիք այսօր:
  • Ծրագիրները շատ են, որովհետեւ օժանդակութեան կարիքը մեծ է: Հիմնուելով «ՌԱԿ Մամուլ» հիմնադրամի նպատակներուն վրայ, որոնցմէ  է ինչպէս ըսինք, սատարել հայրենի թէ աշխարհասփիւռ հայ մամուլի զարգացման ու վերելքին,  ուրախ եմ ձեզ տեղեկացնելու, որ ընդառաջելով «Զարթօնք»-ի խմբագիրին փափաքին, crowd funding-ի միջոցաւ կարելի եղաւ հանգանակութիւն մը ընել՝  նիւթապէս սատարելու Յարութիւն Գալայճեանի՝ «Զարթօնք»-ի մէջ լոյս տեսած «Միլիոնէն մէկը» յուշագրութեան, զոր խմբագրած է դոկտ. Անդրանիկ Տագէսեան, որ շուտով պիտի հրատարակուի որպէս գիրք՝ հիմը դնելով «Զարթօնք» մատենաշարի: «ՌԱԿ Մամուլ» հիմնադրամը յանձնառու է միշտ սատարելու «Զարթօնք» մատենաշարին թէ հայ մամուլի հետ կապուած այլ հրատարակութիւններու հետագայ ծրագիրներուն:
  • Ապագայի ի՞նչ ծրագիրներ ունիք:
  • Ներկայիս, հիմնադրամի գրասենեակը հաստատուած է  ՌԱԿ-ի Երեւանի կեդրոնատեղիին մէջ: Շուտով կը փոխադրուինք մեր նոր հասցէն, ինչ որ մեզի հնարաւորութիւնը պիտի տայ զայն դարձնելու մետիայի համահայկական ակումբ մը, որպէսզի  տրամադրելի ըլլայ սփիւռքի բոլոր լրատուամիջոցներու ներկայացուցիչներուն, որոնք Հայաստան իրենց այցելութեան միջոցին պիտի կարենան օգտուիլ անոր հնարաւորութիւններէն: Նոյն ակումբը պիտի ծառայէ նաեւ մամլոյ ասուլիսներու կազմակերպման եւ նմանօրինակ գործունէութեանց:

 

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին