«ԶԱՐԹՕՆՔ», ՊԷՅՐՈՒԹ – Սեպտեմբեր 24-ին Մինսքի մէջ տեղի ունեցած է Հայաստանի եւ Պելառուսի Հանրապետութիւններուն Ազգային ժողովներուն միջեւ համագործակցութեան միջխորհրդարանական յանձնաժողովի 11-րդ նիստը, որուն ընթացքին ելոյթ ունեցած է ՀՀ ԱԺ նախագահի տեղակալ Էդուարդ Շարմազանովը: Ինչպէս կը փոխանցէ «Արմէնփրես»-ը, ՀՀ Ազգային ժողովի լրատուութեան եւ հանրութեան հետ կապերու վարչութենէն կը տեղեկացնեն, որ, ի թիւս շարք մը հարցերու, ՀՀ ԱԺ փոխնախագահը անդրադարձած է նաեւ ՀԱՊԿ գործունէութեան ու տարածաշրջանային անվտանգութեան խնդիրներուն՝ մասնաւորապէս նշելով.
«Հայ-պելառուսական միջխորհրդարանական յարաբերութիւնները կը կարեւորուին ՀԱՊԿ-ին եւ ԵԱՏՄ-ին մեր երկու պետութիւններու անդամակցութեամբ: Անվտանգութեան հարցերը կը շարունակեն առանցքային ըլլալ մեր տարածաշրջանին համար: Տակաւին 2000 թուականին մեր պետութիւնները Հաւաքական անվտանգութեան պայմանագիրի ծիրէն ներս ընդունած են հռչակագիր, որուն համաձայն կազմակերպութեան անդամ պետութիւններու ռազմասարքային համագործակցութիւնը պէտք է կրէ առաջնային բնոյթ, սակայն գաղտնիք չէ, որ ՀԱՊԿ անդամ որոշ պետութիւններ զէնք կը վաճառեն Ազրպէյճանին: Հարկ կը համարեմ ընդգծել, որ Ազրպէյճանը այդ վաճառուած զէնքով կրակած է, կը կրակէ եւ հաւանաբար պիտի կրակէ ՀԱՊԿ անդամ Հայաստանի ուղղութեամբ: Սա մտահոգիչ է:
Պէտք է նշեմ, որ վերջին շրջանին ազրպէյճանական ուժերը յաճախակի կրակ կ’արձակեն Հայաստանի սահմանակից շրջաններու խաղաղ բնակչութեան ուղղութեամբ, ինչը միջազգային բոլոր կարգերուն կոպտագոյն խախտում է: Կը կարծեմ՝ մեր գործընկերները պէտք է դատապարտեն նման ապակառուցողական քաղաքականութիւնը»:
