«ԶԱՐԹՕՆՔ», ՊԷՅՐՈՒԹ – Թուրքիոյ նախագահ Ռեճեփ Թայիփ Էրտողան վերստին յայտարարած է ՄԱԿ-ի Անվտանգութեան խորհուրդի արմատական բարեփոխումի անհրաժեշտութեան եւ ներկայ վիճակին մէջ համաշխարհային հարցերը լուծելու կազմակերպութեան անընդունակութեան մասին: Ինչպէս կը փոխանցէ «Արմէնփրես»-ը, այդ մասին ան ըսած է Նիւ Եորքի թրքական ու իսլամական համայնքներուն առջեւ ունեցած ելոյթի ժամանակ, ուր ժամանած է ՄԱԿ-ի Գլխաւոր ժողովին մասնակցելու համար:
«ՄԱԿ-ի ԱԽ-ի մշտական եւ ոչ մշտական անդամներու բաժանում պէտք չէ ըլլայ: Եթէ բարեփոխում իրականանայ, ապա կ’ըլլայ քսան մշտական անդամ, բոլոր մայրցամաքներուն եւ դաւանանքներուն ներկայացուցիչները: Միայն այդ ժամանակ ՄԱԿ-ը կը կարողանայ արդարացի գործել»,- Սեպտեմբեր 24-ին Էրտողանի խօսքը մէջբերած է «Hurriyet» թերթը: Թուրքիոյ առաջնորդը նշած է, որ ներկայիս համաշխարհային կազմակերպութիւնը ի վիճակի չէ լուծելու առկայ հակամարտութիւնները:
«Ութ տարիէ Սուրիոյ մէջ կը շարունակուի ճգնաժամը: ՄԱԿ-ը կրցա՞ւ զայն կարգաւորել: Ո՛չ: Իսրայէլը կը շարունակէ ճնշումի քաղաքականութիւնը, թէեւ կան բանաձեւեր, զորս չի կատարեր ան»,- յայտարարած է Էրտողան, հաղորդած է «ՏԱՍՍ»-ը:
