Զրոյցը վարեց՝ ՔՐԻՍԹԻՆԷ ԱՂԱԼԱՐԵԱՆ
«Զարթօնք«ի Երեւանի Աշխատակից
Հայաստանի Անկախութեան 27ամեակին առիթով ՀՀ Վսեմաշուք Նախագահ Պրն. Արմէն Սարգսեան ազնիւ եղաւ յատուկ հարցազրոյց մը շնորհելու մեր թերթի Սեպտեմբերեան Բացառիկին:
Այս առիթով «Զարթօնք»ի ընտանիքին անունով յաջողութիւն եւ արեւշատութիւն կը մաղթենք մեր սիրելի նախագահին:
«Խմբ.»
Հարց– Պարոն նախագահ, անկախութիւն ձեռք բերե՞լն է աւելի դժուար, թէ՞ այն պահպանելը:
Պատասխան– Այն, ինչ առնչուում է անկախութեանը, երբեք չի կարող հեշտ լինել: Պատմութիւնը մէկ անգամ չէ, որ ապացուցել է դա: Ընդ որում, խօսքը վերաբերում է թէ անկախութիւն ձեռք բերելուն, եւ թէ այն պահպանելուն:
Ազատութիւնն ու անկախութիւնը մեր ժողովրդի, Հայաստանի Հանրապետութեան քաղաքացիների համար անշրջելի իրողութիւն եւ իրականութիւն են: Մենք անցեալի ձեռքբերումներով իրաւունք ենք նուաճել լինել այն ժողովուրդների մէջ, ովքեր ունեցել եւ ստեղծել են արժէքներ, ովքեր գիտակցել են ազատութեան գինը եւ անկախութեան անհրաժեշտութիւնը, ովքեր պայքարել են դրանց համար եւ հասել դրանց: Սակայն ներկայում մենք ապրում ենք գերարագ փոփոխութիւնների ժամանակաշրջանում, երբ մենք յաճախ յայտնուում ենք դրանց կիզակէտում, պէտք է մտածենք եւ նախաձեռնենք:
Մենք պարտաւորութիւն ունենք ոչ միայն հպարտանալ անկախութեամբ, այլեւ զարգանալով, ուժեղանալով, նոր նուաճումներ ու յաղթանակներ արձանագրելով պահպանել այն:
Հարց– Պարոն նախագահ, անկախութիւն ձեռք բերած ազգերից մենք ինչո՞վ ենք տարբերուում:
Պատասխան– Մեր երկրում տեղի ունեցած գարնանային վերջին փոփոխութիւնների ժամանակ մենք ցոյց տուեցինք, որ կարող ենք նոյնանման իրավիճակներում լինել իւրայատուկ՝ իրավիճակի եւ այն հանգուցալուծելու մեր ըմբռնումով, փոփոխութիւնների անհրաժեշտութեան մեր գիտակցութեամբ: Մենք պարտաւոր ենք մեր երկիրն առանձնայատուկ դարձնել նշանակալի ձեռքբերումներով, որովհետեւ մենք դա կարող ենք եւ պարտաւոր ենք անել:
Մենք իւրայատուկ ենք մեր արժեհամակարգով, որը պարտաւոր ենք ոչ միայն պահպանել, այլեւ զարգացնել եւ այն ընդօրինակելի դարձնել աշխարհում: Աշխարհը մեր արժէքների, մեր յաջողութեան, մեր քաղաքակրթական ներդրման կարիքն ունի:
