«ԶԱՐԹՕՆՔ», ՊԷՅՐՈՒԹ – ՀՀ արտաքին գործոց նախարարի տեղակալ Արմէն Պապիկեանը Սեպտեմբեր 14-ին Փեքինի մէջ հանդիպած է Չինաստանի արտաքին գործոց նախարարի տեղակալ Ճան Հանհուէյի հետ: Այս մասին, ինչպէս կը փոխանցէ «Արմէնփրես»-ը, կը տեղեկացնեն ՀՀ արտաքին գործոց նախարարութեան լրատուութեան եւ հանրային դիւանագիտութեան վարչութենէն՝ աւելցնելով. «Հանդիպումին յաջորդեցին ՀՀ եւ Չինաստանի ԱԳՆ-ներու միջեւ քաղաքական խորհրդակցութիւնները, որոնց ընթացքին կողմերը վերահաստատեցին հայ-չինական բարեկամական յարաբերութիւններու հետագայ խորացման, շարունակականութեան ու կայուն զարգացման իրենց յանձնառութիւնը:
Քննարկուեցան եւ ձեռք բերուեցան պայմանաւորուածութիւններ քաղաքական երկխօսութեան եւ բարձրաստիճան պաշտօնատար անձանց փոխադարձ այցելութիւններու իրականացման, արտաքին գործոց նախարարութիւններուն միջեւ փոխգործակցութեան, առեւտրատնտեսական համագործակցութեան ներուժի կիրարկման, իրաւական դաշտի ընդլայնման, զբօսաշրջութեան խթանման եւ երկու երկիրներու քաղաքացիներու համար մուտքի արտօնագիրերու կարգի աւելի դիւրացման, այդ կարգին՝ ազատականացման, միջազգային կազմակերպութիւններու շրջանակներուն մէջ համագործակցութեան, Չինաստանի կողմէ Հայաստանին տրամադրուող սարքային օգնութեան, մարդասիրական ոլորտին մէջ շփումներու եւ փոխանակումներու ապահովման շուրջ:
Նախարարի տեղակալ Պապիկեանը ներկայացուց նաեւ ԼՂ հակամարտութեան շուրջ վերջին զարգացումները եւ շնորհակալութիւն յայտնեց չինական կողմին հիմնահարցը բացառապէս խաղաղ ճամբով կարգաւորելու ԵԱՀԿ-ի Մինսքի խումբի համանախագահներու ջանքերուն աջակցելու Չինաստանի դիրքորոշումին համար:
Այցի ծիրէն ներս տեղի ունեցաւ նաեւ Արմէն Պապիկեանի հանդիպումը Չինաստանի Համայնավար կուսակցութեան կեդրոնական կոմիտէի միջազգային բաժինի վարիչի տեղակալ (փոխնախարարի կարգավիճակով) պարոն Ցիան Հոնշանի հետ:
Հանդիպումին շօշափուեցան երկկողմ համագործակցութեան հարցեր: Երկուստեք նշուեցաւ Հայաստանի եւ Չինաստանի զարգացման ռազմավարութիւններու փոխկապակցման եւ խորացման անհրաժեշտութիւնը: Կողմերը գոհունակութիւն արտայայտեցին ձեռք բերուած պայմանաւորուածութիւններու իրականացման ընթացքին վերաբերեալ եւ յայտնեցին իրենց պատրաստակամութիւնը փոխշահաւէտ համագործակցութեան զարգացման առումով:
Սեպտեմբեր 15-ին ԱԳ նախարարի տեղակալի գլխաւորած պատուիրակութիւնը մեկնեց Շանհայ՝ քաղաքային իշխանութիւններու ներկայացուցիչներուն հետ հանդիպումին նպատակով»:
