«ԶԱՐԹՕՆՔ», ՊԷՅՐՈՒԹ-Այսօր Պէյրութի մէջ ազգային յուղարկաւորութեամբ հողին պիտի յանձնուի լիբանանահայ արուեստագէտներու երէց սերունդին պատկանող հսկայ մը՝ Զաւէն Խըտըշեանը։
Զաւէն Խըտըշեան ծնած է Պէյրութ 1932ին: Արուեստագէտը, որուն քանդակները տարածուած են Լիբանանի տարբեր շրջաններու մէջ, կը վայելէր յարգանքը ոչ միայն լիբանանահայութեան, այլ նաեւ Լիբանանի արուեստի շրջանակներուն եւ արուեստասէր հանրութեան։
Խըտըշեան երկար տարիներ եղած է արուեստի դասախօս :
Հանգուցեալ արուեստագէտին գլուխ գործոցը կը համարուի Պիքֆայա գիւղաքաղաքին մէջ գտնուող Մեծի Տանն Կիլիկիոյ Կաթողիկոսութեան ամառային նստավայրին ու ս. Աստուածածին վանքին մօտ կանգնեցուած յուշարձանը, որ ցայսօր ալ կը համարուի սփիւռքի մէջ Հայոց Ցեղասպանութիւնը յիշատակող ամէնէն ազդեցիկ եւ տպաւորիչ կոթողներէն մին։
Զաւէն Խըտըշեանին վերջին յարգանքը պիտի մատուցուի այսօր Անթիլիասի Մայրավանքին մէջ, ազգային յուղարկաւորութեամբ, որ տեղի պիտի ունենայ այսօր Շաբաթ 15 Սեպտեմբեր 2018ի կէսօրուայ ժամը 12ին:
