«ԶԱՐԹՕՆՔ», ՊԷՅՐՈՒԹ – ՀՀ կառավարութիւնը կենսաթոշակառուներուն մօտ ծայրայեղ (պարենային) աղքատութիւնը յաղթահարելու նպատակով կ’առաջարկէ պետական կենսաթոշակային ապահովութեան համակարգին մէջ ներդնել նոր գործիք՝ կենսաթոշակի նուազագոյն չափ։
Այս մասին, ինչպէս կը փոխանցէ «Արմէնփրես»-ը, կը տեղեկացնեն e-draft իրաւական գործողութեանց նախագիծերու հրապարակման միասնական կայքէն:
«Այս գործիքը հնարաւորութիւն կու տայ ալ աւելի հասցէական դարձնելու վարուող քաղաքականութիւնը՝ թիրախաւորելով ցած կենսաթոշակները։
Միաժամանակ ՀՀ պիւտճէական գործընթացի ծիրէն ներս կատարուած հաշուարկներուն մէջ 2019 թուականի Յունուար 1-էն նուազագոյն կենսաթոշակի չափը նախատեսուած է 25.500 դրամ (ծայրայեղ աղքատութեան գիծի չափով): Ըստ այնմ սահմանուած է, որ oրէնքը ուժի մէջ կը մտնէ 2019 թուականի Յունուար 1-էն»,- նշուած է նախագիծին մէջ:
Ըստ նախագիծին` «Պետական կենսաթոշակներու մասին» ՀՀ օրէնքի համաձայն հաշուարկուած՝ նուազագոյն կենսաթոշակի չափէն ցած կենսաթոշակները 2019 թուականի Յունուար 1-էն կը վճարուին նուազագոյն կենսաթոշակի չափով։
2019 թուականի Յունիս 1-ի դրութեամբ կենսաթոշակառուներու թիւը կը կանխատեսուի 497 հազար 394, որոնցմէ աշխատանքային կենսաթոշակառուներ՝ 463 հազար 69 անձ, զինուորական կենսաթոշակառուներ (ուժային մարմիններէն կենսաթոշակ ստացող)՝ 32 հազար 420 անձ, զինուորական կենսաթոշակառուներ (ծառայութենէն կենսաթոշակ ստացող)՝ 1905 անձ։
