Երեքշաբթի, 23. 04. 2024

spot_img

ՌԴ-ի Մէջ Տարբեր Մակարդակի Շուրջ 5 Հազար Ընտրութիւն Տեղի Ունեցած Է Քուէարկութեան Միասնական Օրուան Ծիրին Մէջ

«ԶԱՐԹՕՆՔ», ՊԷՅՐՈՒԹ – Ռուսիոյ մէջ Սեպտեմբեր 9-ին տարբեր մակարդակի շուրջ 5 հազար ընտրութիւն տեղի ունեցած է քուէարկութեան միասնական օրուան ծիրին մէջ: Մասնաւորապէս, ռուսերը ընտրած են Դաշնութեան 26 շրջաններու ղեկավարներն ու 16 տարածաշրջաններու խորհրդարաններու պատգամաւորները, կը փոխանցէ «Արմէնփրես»-ը՝ յղում ընելով «Ինթերֆաքս»-ին:

Բաւականին թէժ պայքար ծաւալուած է Ռուսիոյ չորս տարածաշրջաններու՝ Փրիմորիէի եւ Խապարովսքի երկրամասի, Խաքասիա Հանրապետութեան, ինչպէս նաեւ Խապարովսքի երկրամասի նահանգապետներու ընտրութիւններուն ժամանակ: Այնտեղ կարելի չէ եղած որոշել յաղթողները, թեկնածուները պիտի շարունակեն պայքարիլ երկրորդ փուլին եւս: Այսպէս, Փրիմորիէի երկրամասին մէջ պիտի մրցակցին «Ետինայա Ռուսիա» կուսակցութենէն թեկնածու Անտրէյ Թարասենքօն (հաւաքած է ձայներու 46,56 տոկոսը) եւ համայնավար Անտրէյ Իշչենքօն (24,64 տոկոս): Խապարովսքի երկրամասին մէջ երկրորդ փուլ անցած են ՌԼԴԿ-էն թեկնածու Սերկէյ Ֆուրգալը (35,81 տոկոս) եւ տարածաշրջանի գործող ղեկավար Սերկէյ Շփորթը (35,62 տոկոս): Խաքասիա Հանրապետութեան մէջ ընտրութիւն պիտի ընեն ՌԴ համայնավար կուսակցութենէն թեկնածու Վալենթին Քոնովալովի (44,81 տոկոս) եւ Վիքթոր Զիմինի (32,42 տոկոս) միջեւ: Վերջապէս, Վլատիմիրի մարզին մէջ երկրորդ փուլ անցած են գործող նահանգապետ Սվեթլանա Օռլովան (36,42 տոկոս) եւ ՌԼԴԿ-էն թեկնածու Վլատիմիր Սիփիաքինը (31,19 տոկոս):

Իւրատեսակ մրցանիշ սահմանած է Եամալա-Նենեցիան ինքնավար շրջանի ղեկավարի պաշտօնակատար 30-ամեայ Տմիթրի Արթիւխովը, որուն Օրէնսդիր ժողովի պատգամաւորները նախօրեակին հաստատեցին նահանգապետի պաշտօնին. ան դարձած է տարածաշրջանի ամենաերիտասարդ ղեկավարը Ռուսիոյ մէջ: Միւս տարածաշրջաններուն մէջ նահանգապետի ընտրութիւններուն ընդհանուր առմամբ անակնկալներ չեն գրանցուած, եւ առաջատարներ դարձած են աւելի կանուխ տարածաշրջաններու ղեկավարներու ժամանակաւոր պաշտօնակատարներ նշանակուածները: Մասնաւորապէս, Քրասնոյարսքի երկրամասին մէջ յաղթանակ տարած է նահանգապետի պաշտօնակատար Ալեքսանդր Ուսսը (60,19 տոկոս), Թիւմենի մարզին մէջ՝ Ալեքսանտր Մոորը (65,86 տոկոս), Նիժնի Նովկորոտի մարզին մէջ՝ Կլեպ Նիքիթինը (67,75 տոկոս), Փսքովի մարզին մէջ՝ Միխայիլ Վետիորնիքովը (70,68 տոկոս), Քեմերովոյի մարզին մէջ՝ Սերկէյ Ցիվիլիովը (81,29 տոկոս): Բացի այդ՝ իր պաշտօնը պահպանած է Մոսկուայի մարզի գործող նահանգապետ Անտրէյ Վորովպիովը (62,52 տոկոս):

Մոսկուայի քաղաքագլուխի ընտրութիւններուն սպասելիօրէն յաղթած է Սերկէյ Սոպիանինը: Մոսկուայի գործող քաղաքագլուխը տեղամասային ընտրական յանձնաժողովներէն ստացուած 99 տոկոս արձանագրութիւններու տուեալներու ամփոփումէն ետք կը հաւաքէ ընտրողների ձայներու 70,02 տոկոսը: Մոսկուայի քաղաքային ընտրական յանձնաժողովի տուեալներով՝ Սոպիանինի օգտին քուէարկած են 1,5 միլիոնէն աւելի քաղաքացիներ: Երկրորդ տեղը կը զբաղեցնէ ՌԴ համայնավար կուսակցութեան քաղաքագլուխի թեկնածու Վատիմ Քումինը, որուն օգտին քուէարկած է ընտրողներու 11,44 տոկոսը, երրորդ տեղը «Արդար Ռուսիա»-էն թեկնածու Իլիա Սվիրիտովն է՝ 6,76 տոկոս ձայներով: Ընտրութիւններուն մասնակցութիւնը կազմած է 30,36 տոկոս:

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին