Հինգշաբթի, 25. 07. 2024

spot_img

Հանդիսութիւն` Նուիրուած Լիբանանի «Սուրբ Էջմիածինի Կրօնասէր Տիկնաց Համախմբումին»

Սեպտեմբեր 7-ին Ն.Ս.Օ.Տ.Տ. Գարեգին երկրորդ ծայրագոյն պատրիարք եւ Ամենայն հայոց կաթողիկոսի նախագահութեամբ, Մայր Աթոռ Սուրբ Էջմիածինի Գէորգեան հոգեւոր ճեմարանի հանդիսութիւններու դահլիճին մէջ տեղի ունեցաւ հանդիսութիւն` նուիրուած Լիբանանի Սուրբ Էջմիածինի կրօնասէր տիկնաց համախմբումին: Համախմբումի 75 անդամներ, հրաւէրով Ամենայն հայոց կաթողիկոսի, Լիբանանէն, ԱՄՆ-էն եւ  Գանատայէն օրեր առաջ ժամանած էին Մայր Աթոռ: 

Միջոցառումին ներկայ էին Մայր Աթոռի միաբաններ, Գէորգեան հոգեւոր ճեմարանի սաներ եւ այլ հրաւիրեալներ: 

Հանդիսութիւնը բացուեցաւ միասնական տէրունական աղօթքով, որմէ ետք անդրադարձ կատարուեցաւ  համախմբումի հիմնադրման, մասնակիցներուն ներկայացուց կրօնասէր տիկնաց միութեան գործունէութիւնը` փաստելով անոնց մշտական հաւատարմութիւնը Հայոց եկեղեցւոյ եւ Մայր Աթոռ Սուրբ Էջմիածինին:

Այնուհետեւ ներկաներուն իր սրտի խօսքը ուղղեց համախմբումի ատենապետուհի տիկին Անահիտ Տանձիկեանը՝ ընդգծելով, որ այս մէկշաբաթեայ կեցութիւնը Սուրբ Էջմիածինի մէջ եւ այցելութիւնները Հայաստանի տարբեր սրբավայրեր աւելի զօրացուցին իրենց հաւատքը առ Աստուած եւ նուիրումը Հայոց եկեղեցւոյ հանդէպ: Ապա համախմբումի ատենապետուհին անդրադարձաւ Ամենայն հայոց կաթողիկոսի եւ Մայր Աթոռի գործունէութեան կրթական, հասարակական, մշակութային, բարեգործական եւ ընկերային կեանքի ոլորտներուն մէջ՝ բոլորին անունով հայոց հովուապետին փոխանցելով կենաց արեւշատութեան եւ արդիւնաշատ գահակալութեան բարեմաղթանքները (Տիկ. Տանձիկեանի խօսքը ամբողջութեամբ կը հրատարակենք յաջորդիւ)։ 

Այնուհետեւ ցուցադրուեցաւ «Շողակաթ» հեռուստաընկերութեան կողմէ Լիբանանի Սուրբ Էջմիածինի կրօնասէր տիկնաց համախմբումի եւ իր անդամներուն Հայաստան այցի մասին պատրաստուած ֆիլմը: 

Ապա ներկաներուն իր օրհնութեան խօսքը ըսաւ Նորին Սրբութիւն Գարեգին երկրորդ Ամենայն հայոց կաթողիկոսը: 

Վեհափառ հայրապետը արձանագրեց, որ «Սուրբ Էջմիածինի կրօնասէր տիկնաց համախմբումին» նուիրուած հանդիսութիւնը կոչուած է վերստին արժեւորելու ազգային-եկեղեցական կեանքի մէջ համախմբումի անդամներուն որդիական սիրոյ եւ նուիրումի ոգին ու երախտարժան վաստակը:

«… Միութեան անդամուհիները ժամանած են հայրենիք եւ Մայր Աթոռ՝ նորոգելու մեր սուրբ եկեղեցւոյ հանդէպ ծառայանուիրումի իրենց ուխտը, որով առաջնորդուած եւ զօրացած են տասնամեակներու եկեղեցանպաստ իրենց գործունէութեան մէջ: 

Սուրբ Էջմիածինի կրօնասէր տիկնաց համախմբումը հիմնուեցաւ 1959 թուականին, երբ պաղ պատերազմը իր ցաւալի ներգործութիւնը ունեցաւ եկեղեցական մեր կեանքին մէջ՝ տագնապներ ստեղծելով Ամենայն հայոց հայրապետութեան եւ Մեծի Տանն Կիլիկիոյ կաթողիկոսութեան յարաբերութիւններուն մէջ: Այդ դժուարին օրերուն լիբանանահայ խումբ մը քաջասիրտ հայուհիներ անմնացորդ սիրով ամուր պահեցին եւ վկայեցին իրենց հաւատարմութիւնն ու նախանձախնդրութիւնը հանդէպ քրիստոսահաստատ Սուրբ Էջմիածինը: Տասնամեակներ շարունակ ազնուահոգի հայուհիները իրենց առաքինի գործունէութեամբ արժեւորած են ազգային-եկեղեցական մեր անդաստանին մէջ կանանց բարձրապատիւ դերն ու սպասաւորութիւնը՝ նմանութիւն բերելով սուրբ Եղիշէ պատմիչի կողմէ ներբողուած հայոց աշխարհի փափկասուն տիկնաց: Բարեսիրական իրենց բեղուն գործունէութեամբ անոնք անփոխարինելի ծառայութիւն  մատուցած եւ կարեւոր նպաստ բերած են մեր սրբութիւն սրբոց Մայր Աթոռ Սուրբ Էջմիածինի յաւէտ պայծառութեան: 

Սիրելի անդամուհիներ Սուրբ Էջմիածինի կրօնասէր տիկնաց համախմբումի, ուրախութիւն է մեզի համար, որ նուիրեալ հայուհիներդ, շարունակելով միութեան հիմնադիր երանեալ անդամուհիներու, ձեր երախտարժան մայրերու բարի աւանդը, այսօր ալ մեր սուրբ եկեղեցւոյ առաքելութիւնը աւելի արդիւնաւորելու ազնուագոյն տեսլականով կը հարստացնէք ձեր վաստակը նորանոր իրագործումներով։ Ձեր ջանքերով ու միջոցներով ստեղծուած եկեղեցական զգեստներն ու սպասքը եւ եկեղեցւոյ յարդարանքի այլ գեղեցկակար պարագաները շուք ու վայելչութիւն կը հաղորդեն եկեղեցական արարողութիւններուն եւ ծիսակատարութիւններուն ու կը նպաստեն հոգեւոր-եկեղեցական կեանքի բարեզարդութեան: Ձեր եռանդն ու նուիրումը կը քաջալերեն նաեւ ձեր ամուսինները՝ իրենց ջանքերով սատար ու զօրակից ըլլալու ձեր բարի առաքելութեան: Գովարժան է նաեւ, որ միութեան շարքերուն կը ներգրաւէք ձեր դուստրերն ու երիտասարդ օրիորդները, որպէսզի անոնք ձեր հաւատքի, բարեպաշտութեան ու աստուածահաճոյ բարեգործութիւններուն վառ օրինակով նոյնպէս իրենց ջանքերը բերեն հոգեւոր-եկեղեցական մեր անդաստանի բարեզարդման համար: Յիրաւի, եկեղեցին զօրեղ ու պայծառ է իր զաւակներուն ամուր հաւատքով ու նուիրեալ գործերով: Այսօր եւս, երբ ազգովի կանգնած ենք նոր մարտահրաւէրներու առջեւ, մեր եկեղեցին ու երկիրը աւելի կարիքը ունին իրենց զաւակներուն աջակցութեան: Քրիստոնեայի համար անկարելի է մնալ դիտորդ, երբ եկեղեցին ու հայրենիքը իր զօրակցութեան անհրաժեշտութիւնը ունին, երբ փորձեր կ’ըլլան քարկոծելու եւ վնասելու եկեղեցին, նսեմացնելու հոգեւոր-բարոյական արժէքները, խարխլելու մեր ինքնութեան հիմնասիւները՝ եկեղեցին ու ընտանիքը: Եկեղեցւոյ առջեւ ծառացող բոլոր մարտահրաւէրները յաղթահարելի են եկեղեցւոյ յետեւորդներու` դաւանուած արժէքներու հանդէպ հաւատարմութեամբ եւ հոգեւոր կեանքի մէջ աշխոյժ ներգրաւուածութեամբ: Ձեզմէ, իւրաքանչիւր հայ կնոջմէ կախուած է նաեւ մեր եկեղեցւոյ, մեր ժողովուրդին ու մեր երկրին ապագան, որովհետեւ հաւատաւոր ու բարեպաշտ կանայք են հայ ընտանիքի սիւնը, հոգեւոր ու բարոյական արժէքներու սնուցողը, զաւակներու նկարագիրը կերտողը», – ըսաւ Ամենայն հայոց կաթողիկոսը:  

Վերստին հայրապետական իր բարձր գնահատանքն ու օրհնութիւնը բերելով համախմբումի երախտարժան անդամներուն` Նորին Վեհափառութիւնը յորդորեց նոյն կորովով ու եռանդով շարունակել իրենց կարեւոր առաքելութիւնը՝ ի շինութիւն մեր հայրենիքի եւ սուրբ եկեղեցւոյ, ի պայծառութիւն Մայր Աթոռ Սուրբ Էջմիածինի եւ ի փառս Բարձրեալն Աստուծոյ: 

Նորին Սրբութիւնը աղօթքով յիշեց Սուրբ Էջմիածինի կրօնասէր տիկնաց համախմբումի լուսահոգի հիմնադիրներուն, ատենապետուհիներ՝ Արշալոյս Այվազեանին եւ Անգինէ Տանձիկեանին, առանձին գոհունակութեամբ իր գնահատանքը, սէրն ու օրհնութիւնը բերաւ տիկնաց համախմբումի պատուաւոր ատենապետուհի Միմի Յարութիւնեանին եւ գործող ատենապետուհի Անահիտ Տանձիկեանին, որոնք մեծ աւանդ ունին համախմբումի եկեղեցանպաստ ծառայութեան մէջ: 

«Կը մաղթենք ձեզի, սիրելի՛ անդամուհիներ, երջանկութիւն եւ եկեղեցաշահ գործոց նոր յաջողութիւններ: Հպարտ ենք ձեր հաւատքով եւ առ եկեղեցին ձեր անխախտ սիրով: Թող ամենակարող Աստուծոյ օրհնութիւնն ու աջակցութիւնը միշտ ուղեկից ըլլան ձեզի եւ համայն մեր ժողովուրդին ի հայրենիս եւ ի սփիւռս»,- աւարտին աւելցուց Ամենայն հայոց կաթողիկոսը:

Հանդիսութիւնը հայրենասիրական, ժողովրդական եւ հոգեւոր երգերով համեմեցին «Նոր անուններ» ծրագիրի շնորհալի պատանի երաժիշտ-կատարողները` ղեկավարութեամբ ՀՀ մշակոյթի վաստակաւոր գործիչ Սիլվա Մեքինեանի:

Երեկոյթը ամփոփուեցաւ «Պահպանիչ» աղօթքով:

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին