«ԶԱՐԹՕՆՔ», ՊԷՅՐՈՒԹ – Ներքին անվտանգութեան ուժերու տեղեկատուական բաժինը Շաբաթ հետաքննութիւն սկսաւ Ռաֆիք Հարիրի օդակայանին մէջ գրանցուած համակարգչային խանգարումի կապակցութեամբ, որ պատճառ դարձած էր հազարաւոր ճանապարհորդներու թռիչքի սահմանուած ժամանակացոյցի փոփոխման:
Աղբիւրը կը յայտնէ, որ Ներքին անվտանգութեան ուժերը հետաքննութիւն սկսաւ պետական դատախազ Սամիր Համմուտի խնդրանքով, ուր վերջինս, իր կարգին, կ’արձագանգէր արդարադատութեան նախարար Սալիմ Ժրէյսաթիի՝ միջադէպի հետաքննութեան խնդրանքով կատարած առաջարկին:
«Այս միջադէպին կապակցութեամբ կան հակասական հաղորդումներ, զորս հարկ է հետազօտել»,- ըսաւ աղբիւրը: «Ոմանք կ’ըսեն, թէ համակարգչային խանգարումները դիտումնաւոր էին, իսկ ուրիշներ կ’ըսեն, թէ միմիայն համակարգչային սխալ մըն էր եղածը եւ պատասխանուութիւնը ամբողջութեամբ ընկերութեան վրայ է»:
