«ԶԱՐԹՕՆՔ», ՊԷՅՐՈՒԹ – Թուրքիոյ մէջ Յունիս 24-ին տեղի ունեցած նախագահական ընտրութիւններուն վերաբերեալ Եւրոպայի խորհուրդի խորհրդարանական վեհաժողովին կողմէ հրապարակուած զեկոյցին համաձայն՝ ընտրութիւնները անցած են անհաւասար պայմաններու մէջ, կը յայտնեն թրքական լրատուամիջոցները:
«Արմէնփրես»-ի հաղորդմամբ՝ ԵԽԽՎ զեկոյցին մէջ կ’ըսուի, որ ընտրութիւններուն մասնակցող թեկնածուներու նախընտրական քարոզարշաւը ընթացած է անհաւասար պայմաններու մէջ, եւ պատշաճ չէ եղած նաեւ քաղաքացիներու առարկայական տեղեկութիւն ստանալու հնարաւորութիւնը:
Լրատուամիջոցները հիմնականօրէն անդրադարձած են գործող նախագահ Ռեճեփ Թայիփ Էրտողանին եւ իր գլխաւորած Արդարութիւն եւ զարգացում կուսակցութեան (ԱԶԿ), ինչը նոյնպէս կը խօսի նախընտրական շրջանին թեկնածուներուն համար եղած անհաւասար պայմաններուն մասին:
Թուրքիոյ մէջ Յունիսին տեղի ունեցած ընտրութիւններուն դիտորդական առաքելութիւն իրականացուցած է ԵԽԽՎ յանձնաժողովի 28 դիտորդ:
ԵԽԽՎ կողմէ հրապարակուած զեկոյցը Հոկտեմբեր 8-ին պիտի քննարկուի Սթրասպուրկի մէջ կայանալիք ԵԽԽՎ ընդհանուր յանձնաժողովի նիստին:
