«ԶԱՐԹՕՆՔ», ՊԷՅՐՈՒԹ – ՀՀ Ազգային ժողովը առաջին ընթերցմամբ ընդունեց ՀՀ կառավարութեան ներկայացուցած օրէնսդրական նախագիծերու փաթեթը: «Արմէնփրես»-ի փոխանցմամբ՝ Սեպտեմբեր 6-ին մեկնարկած ԱԺ արտահերթ նստաշրջանը գումարուած է ՀՀ կառավարութեան նախաձեռնութեամբ:
Արտահերթ նստաշրջանի օրակարգին ներկայացուած էր «Հայաստանի Հանրապետութեան քրէական օրէնսգիրքին մէջ փոփոխութիւններ եւ լրացումներ կատարելու մասին», «Հայաստանի Հանրապետութեան քրէական դատավարութեան օրէնսգիրքին մէջ լրացում կատարելու մասին», «Վարչական իրաւախախտումներու վերաբերեալ Հայաստանի Հանրապետութեան օրէնսգիրքին մէջ փոփոխութիւններ եւ լրացումներ կատարելու մասին» օրէնսդրական նախագիծերու փաթեթը, որ կ’ենթադրէ ընտրական խախտումներու հետ կապուած պատիժներու խստացում:
ՀՀ արդարադատութեան նախարարութիւնը ԱԺ-ին կ’առաջարկէ վարչական իրաւախախտում համարել նախընտրական քարոզչութեան ժամանակ թեկնածուներու, կուսակցութիւններու եւ կուսակցութիւններու դաշինքներուն կողմէ բարեգործութեան անուան տակ ընտրողներուն անհատոյց կամ արտօնեալ պայմաններով դրամ, սննդամթերք, արժեթուղթեր, ապրանքներ տալը, խոստանալը կամ ծառայութիւններ մատուցելը։ Վարչական պատասխանատուութիւն կը սահմանուի նաեւ բարեգործութեան հետ միաժամանակ նախընտրական քարոզչութիւն իրականացնելու համար: Առաջարկուող փոփոխութիւններով քրէական պատասխանատուութեան կ’ենթարկուին ոչ միայն կաշառք բաժնողները, այլեւ ստացողները։
Կը նախատեսուի նաեւ քրէական պատասխանատուութիւն սահմանել ներկայիս յանցագործութիւն չհամարուող շարք մը արարքներու՝ ընտրողի կողմէ կաշառքի առաջարկին համաձայնելու, կաշառքի խոստումը ընդունելու, կաշառք խնդրելու, սեփական քուէարկութեան գաղտնիութիւնը դիտաւորութեամբ խախտելու համար:
Օրէնսդրական նախագիծերու փաթեթի ընդունումէն ետք փոփոխութիւնները կը գործարկուին Սեպտեմբեր 23-ին կայանալիք Երեւանի աւագանիի արտահերթ ընտրութիւններուն:
