Ն.Ս.Օ.Տ.Տ. Գարեգին երկրորդ ծայրագոյն պատրիարք եւ Ամենայն հայոց կաթողիկոսը Արցախի Հանրապետութեան անկախութեան տօնի առիթով շնորհաւորական ուղերձ յղած է Արցախի նախագահ Բակօ Սահակեանին եւ բարեպաշտ ժողովուրդին:
Ինչպէս կը փոխանցէ «Արմէնփրես»-ը, Մայր Աթոռ Սուրբ Էջմիածինի տեղեկատուական համակարգէն կը տեղեկացնեն, որ շնորհաւորագիրին մէջ մասնաւորապէս կ’ըսուի.
«Մայր Աթոռ Սուրբ Էջմիածնից հայրապետական մեր օրհնութիւնն ու շնորհաւորանքներն ենք բերում ձեզ, Արցախի իշխանութիւններին եւ բարեպաշտ մեր ժողովրդին անկախութեան տօնի առիթով:
Գոհունակութեան, ցնծութեան եւ հպարտութեան զգացումով է այսօր լցուած մեր հոգին: Ազգովի տօնում ենք 27-րդ տարեդարձը Արցախի Հանրապետութեան անկախութեան, 27-րդ տարեդարձը արցախահայութեան ազատ, արժանապատիւ կեանքով ապրելու կամարտայայտութեան: Մեր մտապատկերում վեր են յառնում դժուարին տարիներն արցախեան գոյապայքարի:
Առ Աստուած ապաւինութեամբ ազգս հայոց ոտքի կանգնեց պաշտպանելու իր արդար իրաւունքները հայրենի պատմական Արցախում՝ փաստելով, որ Հայոց ցեղասպանութեամբ հայ ժողովրդի համար բացուած 20-րդ դարը չի կարող մայր մտնել նոյնպիսի ոճրագործութեամբ:
Յաղթանակեց հայրենիքի հանդէպ անմնացորդ սէրն ու նուիրումը: Մեր ժողովրդի արի զաւակները արեան գնով ու անօրինակ սխրանքներով ազատագրեցին հայրենի հողը: Արցախեան հերոսամարտը պսակուեց հռչակումով անկախ պետականութեան, մի ճանապարհ, որին արցախահայութիւնը ոտք դրեց գալիք բոլոր դժուարութիւնների եւ փորձութիւնների քաջ գիտակցութեամբ եւ մարտահրաւէրներին դիմագրաւելու յանձնառութեամբ:
Փառք Աստծոյ, հակառակ ամենածանր պայմանների, բազում դժուարութիւնների ու նեղութիւնների, պատերազմի վերսկսման մշտական սպառնալիքի՝ մեր զաւակները, ազատութեան արժէքի ամենաբարձր գիտակցութեամբ, իրենց արժանապատիւ կեանքը կերտեցին եւ շարունակում են իրենց նախնեաց քաջարի, անկոտրում ոգու եւ հաւատի կրողը մնալ: Մենք հպարտ ենք Արցախի մեր սիրեցեալ ժողովրդով եւ աջակից նրա հայրենաշէն ու ազգանուէր ծրագրերին` մշտապէս աղօթում ենք նրա խաղաղ, բարօր եւ արգասաբեր կեանքի համար:
Մեծարգոյ նախագահ, բարձր ենք գնահատում Արցախի առջեւ ծառացած մարտահրաւէրների յաղթահարմանն ուղղուած ձեր նուիրումն ու անդուլ ջանքերը եւ Արցախի մեր բարեպաշտ ժողովրդի իղձերի իրականացմանը միտուած ծրագրերը:
Աղօթում ենք, որ բարձրեալն Աստուած Իր Սուրբ Աջով խաղաղ երկնքի ներքոյ բարօր պահպանի մեր Արցախ աշխարհը, միասնական ու համախումբ պահի արցախահայութեանը` պարգեւելով անվրդով ու ապահով, շէն ու պայծառ կեանք»:
